តុលាការមជ្ឈត្តកម្មកីឡា (CAS) បានគាំទ្រការសម្រេចរបស់ FIFA ក្នុងការច្រានចោលនូវសំណើរបស់ Munir El Haddadi ដែលបានស្នើសុំចូលលេងឱ្យក្រុមជម្រើសជាតិម៉ារ៉ុក។
សហព័ន្ធកីឡាបាល់ទាត់ម៉ារ៉ុក(FRMF) បានស្នើសុំ FIFA សម្រាប់ការអនុញ្ញាតឱ្យ ខ្សែប្រយុទ្ធ El Haddadi អាចប្ដូរចេញពីក្រុមជម្រើសជាតិអេស្ប៉ាញ ដែលរូបគេបានចូលលេងកាលប្រកួតវគ្គជម្រុះ Euro ក្នុងវ័យ១៩ឆ្នាំ។
FRMF រំពឹងថា កំណែទម្រង់ច្បាប់មួយចំនួន របស់ FIFA កាលពីថ្មីៗនេះ ដែលអនុញ្ញាតឱ្យកីឡាករវ័យក្រោម២១ឆ្នាំ មានសិទ្ធផ្លាស់ប្ដូរក្រុមជម្រើសជាតិ បើទោះបីជាកីឡាកររូបនោះ បានចូលលេងក្នុងពានរង្វាន់ផ្លូវការចាប់ពី៣ប្រកួតឡើងទៅក៏ដោយ។
ប៉ុន្ដែកាលពីខែកញ្ញា FIFA បានរកឃើញថា El Haddadi ធ្លាប់លេងឱ្យក្រុមជម្រើសជាតិអេស្ប៉ាញក្រោម២១ឆ្នាំ ហើយនៅពេលដែលខ្សែប្រយុទ្ធរូបនេះ លើសអាយុ២១ឆ្នាំទៅហើយ ដូច្នេះហើយរូបគេមិនស្ថិតនៅក្នុងលក្ខខណ្ឌ ដែលអាចប្ដូរលេងឱ្យក្រុមជម្រើសជាតិម៉ារ៉ុកបានឡើយ។
គួររំឭកថា អតីតកីឡាករក្រុម Barcelona រូបនេះ បានហ្វឹកហាត់ជាមួយក្រុមម៉ារ៉ុក អំឡុងពេលប្រមូលផ្ដុំជម្រើសជាតិកាលពីខែតុលា មុនពេលត្រូវផ្ដល់ដំណឹងថា រូបគេមិនត្រូវបានអនុញ្ញាតឱ្យចូលរួមលេងជាមួយក្រុមជម្រើសជាតិមួយនេះបាន៕
