កីឡាករ Peter Crouch បានយល់ឃើញថាកលល្បិចដឹកនាំ Tottenham Hotspur របស់ Antonio Conte គឺដូចគ្នាទៅនឹងអ្វីដែលលោកធ្លាប់បានឆ្លងកាត់កាលលេងនៅ Stoke City។
ក្លិបបាល់ទាត់ Spurs បានរងបរាជ័យជាលើកដំបូងក្នុងក្របខណ្ឌ Premier League រដូវកាលនេះកាលពីថ្ងៃសៅរ៍ ទី០១ ខែតុលា ឆ្នាំ២០២២ ដោយត្រូវបានក្រុមកាំភ្លើងធំ Arsenal យកឈ្នះក្នុងលទ្ធផល 3-1 នៅកីឡដ្ឋាន Emirates។
Tottenham មានឱកាសច្រើននៅវគ្គទី១ក្នុងការវាយបកប៉ុន្តែ Crouch មានអារម្មណ៍ថា Conte រៀបចំក្រុមលេងការពារខ្លាំងពេកទល់នឹងក្រុមរបស់ Mikel Arteta។ Peter Crouch បាននិយាយក្នុងអំឡុងពេលវិភាគសម្រាប់ BT Sport ថា៖ “ខ្ញុំធ្លាប់លេងបាល់របៀបបែបនេះកាលនៅ Stoke។ Spurs មានកីឡាករគ្រប់គ្រាន់ក្នុងការមិនលេងបាល់របៀបបែបនេះខ្ញុំគិតថាពួកគេអាចធ្វើអ្វីបានលើសពីនេះ។ប៉ុន្តែប្រសិនបើអ្នកសម្រេចលេងតាមរបៀបនឹងនោះអ្នកត្រូវមានកីឡាករនៅខាងលើឲ្យច្រើនហើយមានការចេញបាល់ទៅតំបន់ប្រយុទ្ធ អ្នកត្រូវតែច្បាស់ក្នុងការចេញបាល់និងដាក់ការគាបសង្កត់ដៃគូប្រកួត”។
កាលពីយប់ថ្ងៃអង្គារ ទី០៥ ខែតុលា ក្រុម Spurs បានទទួលរងនូវលទ្ធផលខកចិត្តបន្ថែមទៀតដោយរកបានត្រឹមតែ១ពិន្ទុប៉ុណ្ណោះបន្ទាប់ពីស្មើគ្នា 0-0 ជាមួយ Eintracht Frankfurt ក្នុងក្របខណ្ឌ Champions League។លទ្ធផលនេះបានធ្វើឲ្យ Spurs ស្ថិតនៅលេខរៀងទី២ ក្នុងពូល D ដោយមាន៤ពិន្ទុក្រោយឆ្លងកាត់ការប្រកួត៣ប្រកួតខណៈ Sporting ឈរនៅកំពូលតារាងមាន៦ពិន្ទុ។
ថ្លែងបន្ទាប់ពីក្រុមរបស់លោកស្មើនៅទឹកដីអាល្លឺម៉ងលោក Conte បានទទួលស្គាល់ថាក្រុមរបស់លោកនៅពេលនេះធ្វើមិនទាន់បានល្អឡើយ។
Conte ថា៖ “ខ្ញុំគិតថាយើងពិតជាធ្វើបានល្អមែនទែនដែលមាសឱកាសលេងនៅ Champions League។យើងបានបញ្ចប់រដូវកាលដោយនៅសល់កីឡាករប្រមាន១២ឬ១៣នាក់ប៉ុណ្ណោះ។ខ្ញុំតែងតែនិយាយថាប្រហែលជាយើងសំណាងហើយដែលបានចូលប្រកួតនៅពានរង្វាន់ដ៏ធំនេះ ប្រសិនបើអ្នកប្រៀបធៀប Champions League ជាមួយ Europa League ឬ Conference League នោះវាខុសគ្នាទាំងស្រុង។អ្នកត្រូវតែលេងជាមួយនឹងក្រុមដ៏ខ្លាំងបំផុតដែលអ្នកមានហើយវាមិនមានភាពងាយស្រួលឡើយក្នុងការធ្វើវា។ខ្ញុំបាននិយាយទាក់ទងទៅនឹងទីផ្សារដោះដូរកីឡាករហើយយើងពិតជាត្រូវការកីឡាករចំណូលថ្មីបន្ថែមទៀត”។
“ការប្រកួតថ្ងៃនេះខ្ញុំបានធ្វើការប្តូរកីឡាករ Bryan Gil ឲ្យលេងអ្នកដឹងហើយគេជាកីឡាករវ័យក្មេង។យើងត្រូវផ្តល់ឱកាសឲ្យកីឡាករទាំងអស់បានលេង ក្រុមទាំងមូលត្រូវតែរឹងមាំ។ប្រសិនបើយើងមានមានមហិច្ឆតានិងបំណងចង់ឈ្នះការប្រកួតនៅ Premier League និង Champions League ហើយកីឡាករបាត់បង់ថាមពលនិងកីឡាករជាច្រើនមានបញ្ហារបួសនោះប្រាកដណាស់យើងពិតជាត្រូវការកីឡាករច្រើនបន្ថែមទៀត”។Conte បន្ថែម៕
