Real Madrid បានគ្រងជើងឯក UEFA Champions League រដូវកាលមុន និងជាការឈ្នះលើកទី១៥ក្នុងប្រវត្តិសាស្ត្ររបស់ពួកគេ។ ក្នុងរដូវកាលនេះ ពួកគេបានឡើងទៅកាន់វគ្គ៨ក្រុមចុងក្រោយ និងត្រូវបានចាត់ទុកថាជាបេក្ខភាពប្រជែងជើងឯកផងដែរ ក្នុងរដូវកាលនេះ។
ពួកគេនឹងត្រូវលេងតទល់ជាមួយ Arsenal ក្នុងវគ្គ១/៤ផ្ដាច់ព្រ័ត្រ UCL ខណៈក្រុមកាំភ្លើងធំ ប្រឈមនឹងក្ដីបារម្ភចំពោះខ្សែប្រយុទ្ធមុតស្រួចដូចជា Vinicius Jr., Kylian Mbappe និង Rodrygo ជាដើម ស្របពេលដែលខ្សែការពារឆ្នើម Gabriel Magalhaes និង Jurrien Timber ត្រូវបានប្ដូរចេញអំឡុងការប្រកួត Premier League ទល់ Fulham។
កីឡាករប្រេស៊ីល Gabriel ជាសមាជិកដែលបង្ហាញសមត្ថភាពបានល្អបំផុតក្នុងក្រុមបង្វឹកដោយលោក Mikel Arteta ក្នុងការរារាំងសំណាញ់ទីគូប្រកួត ហើយគេក៏រកគ្រាប់បាល់បាន៥គ្រាប់ផងដែរ ក្នុងរដូវកាលនេះ។
ក្នុងការប្រកួតលីគកំពូលអង់គ្លេសដែលក្រុមកាំភ្លើងធំទទួលបានជ័យជម្នះ ២-១លើ Fulham ខ្សែការពារ Gabriel បានបង្ហាញអាការៈឈឺចាប់សរសៃរពួរ ហើយត្រូវបានប្ដូរចេញភ្លាមៗជំនួសដោយខ្សែការពារ Jakub Kiwior ហើយ Timber ក៏ត្រូវបានប្ដូរចេញនៅចុងវគ្គទី២ ផងដែរ ក្រោយពេលដែលគេបង្ហាញការឈឺចាប់នៅត្រង់ជង្គង់ ដែលនេះជាក្ដីបារម្ភសម្រាប់ Arsenal ដ្បិតការប្រកួតទល់ Real Madrid កាន់តែកៀកចូលមកដល់។
ថ្លែងក្រោយចប់ការប្រកួតអ្នកចាត់ការ Arteta បាននិយាយថា៖ “Gabi មានអារម្មណ៍មិនស្រួលនៅលើសរសៃរពួររបស់គេ។ យើងមិនដឹងថាស្ថានភាពរបស់គេនឹងធ្ងន់ធ្ងរយ៉ាងណាទេ ចំណែក Jurrien ក៏អ៊ីចឹងដែរ។ គេបង្ហាញការពិបាកតាំងពីពេលចាប់ផ្ដើមការប្រកួត។ គេព្យាយាមបន្ដលេង តែដល់ចំណុចមួយគេមិនអាចបន្ដទៀតបាន។ ដូច្នេះស្ថានភាពមិនល្អនោះទេ”។
ដោយឡែកក្រុមអធិរាជស ប្រឈមនឹងវិបត្តិខ្វះខាតជម្រើសតំបន់ការពារជាច្រើនផងដែរ ដោយសារខ្សែការពារ Dani Carvajal, Eder Militao និង Ferland Mendy ត្រូវឃ្លាតឆ្ងាយពីទីលានដោយសាររបួស ស្របពេលដែលពួកគេត្រូវប្រជែងពាន៣ក្នុងរដូវកាលនេះ ក្រោយទើបយកឈ្នះ Real Sociedad ឡើងផ្ដាច់ព្រ័ត្រ Copa del Rey កាលពីយប់មិញ។
មុនក្រុមទាំងពីរជើងគ្នានៅទឹកដី Emirates នារាត្រីថ្ងៃអង្គារសប្ដាហ៍ក្រោយ Arsenal នៅសល់មួយប្រកួតក្នុងលីគអង់គ្លេសនៅទឹកដីរបស់ Everton ចំណែក Real ត្រូវស្វាគមន៍ Valencia ក្នុងក្របខណ្ឌ La Liga៕
