ការប្រកួត Supercopa de España ឬ Spanish Super Cup រដូវកាល២០២០-២១ ដែលមាន៤ក្រុមចូលរួម មានដូចជា ក្រុមការពារជើងឯក La Liga រដូវកាល ២០១៩-២០ ក្រុមរងជើងឯក Barcelona រួមជាមួយក្រុមដែលឡើងទៅវគ្គផ្ដាច់ព្រ័ត្រ Copa del Rey រដូវកាលមុន គឺ Athletic Bilbao និង Real Sociedad។
ការប្រកួតនេះត្រូវបានត្រៀមរៀបចំឡើងនៅ ប្រទេសអារ៉ាប៊ី សាអ៊ូឌីត ប៉ុន្ដែគម្រោងត្រូវបានផ្លាស់ប្ដូរ ដោយការប្រកួតប្ដូរមករៀបចំនៅអេស្ប៉ាញវិញ ដើម្បីបង្ការការរាលដាលនៃជំងឺកូវីដ១៩។
ផ្អែកលើហេតុផលស្រដៀងគ្នានេះ ការប្រកួតវគ្គផ្ដាច់ព្រ័ត្រ Copa del Rey 2019-20 ដែលដំបូងឡើយត្រូវប្រកួតនៅថ្ងៃទី១៨ ខែមេសា ឆ្នាំ២០២០ ត្រូវបានលើកពេល ដោយសារពេលនោះការប្រកួតបាល់ទាត់ទាំងអស់បានផ្អាកដោយសារជំងឺរាតត្បាតសកល ហើយលើកទៅធ្វើនៅថ្ងៃទី៤ ខែមេសា ឆ្នាំ២០២១វិញ។
ការប្រកួតវគ្គពាក់កណ្ដាលផ្ដាច់ព្រ័ត្ររវាង Real Sociedad និង Barcelona នឹងធ្វើឡើងនារាត្រីនេះ វេលាម៉ោង ៣៖០០នាទីរំលងអាធ្រាត នៅទីក្រុង Cordoba ហើយមួយគូទៀតរវាង ក្រុមការពារជើងឯក Real Madrid និង Athletic Bilbao នឹងប្រកួតនៅរាត្រីថ្ងៃស្អែកនៅទីក្រុង Malaga ហើយវគ្គផ្ដាច់ព្រ័ត្រនឹងធ្វើនៅទីក្រុង Seville នាថ្ងៃទី១៧ ខែមករា ខាងមុខនេះ។
សូមបញ្ជាក់ថា ការប្រកួត Super Cup បានផ្លាស់ប្ដូរពី២ក្រុម ដែលប្រកួតពីរជើងនៅវគ្គផ្ដាច់ព្រ័ត្រ មកជា៤ក្រុមដែលលេងវគ្គពាក់កណ្ដាលផ្ដាច់ព្រ័ត្រតែមួយជើង ដែលអ្នកឈ្នះឡើងទៅប្រកួតគ្នានៅវគ្គផ្ដាច់ព្រ័ត្រ៕
