ប្រិយមិត្តអ្នកតាមដានបាល់ទាត់អឺរ៉ុបប្រហែលជាបានជ្រាបហើយថា Savinho ជាសមាជិកថ្មីទី១របស់ Manchester City ក្នុងរដូវក្ដៅ២០២៤នេះ ក្រោយផ្លាស់មកពីក្លឹបបារាំង Troyes ក្នុងតម្លៃ៣៣,៧លានផោន ឬ៤៣,៥លានដុល្លារអាមេរិក។ ប៉ុន្តែប្រិយមិត្តប្រហែលមិនទាន់ជ្រាបទេអំពីខ្សែជីវិតដ៏មិននឹកស្មានដល់របស់កីឡាករវ័យ២០ឆ្នាំរូបនេះ ពីក្មេងកសិករនៅតំបន់ជនបទនៃប្រទេសប្រេស៊ីលដែលធ្វើការដាំបន្លែ ច្របាច់ដោះគោជាមួយជីតា ក្លាយជាកីឡាករអាជីពនៅក្លឹបបាល់ទាត់លំដាប់ពិភពលោក Manchester City និងជាប់ជម្រើសជាតិប្រេស៊ីលលេងពាន Copa America 2024។
Savinho បានកើតនៅថ្ងៃទី១០ខែមេសាឆ្នាំ២០០៤ និងធំធាត់នៅផ្ទះជីដូនជីតារបស់គេនៅតំបន់ជនបទ Sao Mateus ភាគអាគ្នេយ៍ប្រទេសប្រេស៊ីល។ កាលនៅតូច អ្វីដែលគេរៀនមុនគេគឺជិះសេះ ច្បូតដោះគោយកទឹកដោះ និងដាំបន្លែដូចជាសាឡាត់ ននោងបារាំង និងប៉េងបោះ ជាដើម។ ស្រុកកំណើតនិងការងារទាំងអស់នេះនៅតែជាគោលដៅសំណព្វចិត្តរបស់ Savinho មកទល់នឹងពេលនេះ។ ម្ដាយរបស់គេគឺអ្នកស្រី Dona Nilma បាននិយាយថា ប្រសិនបើអ្នកសួរកូនរបស់ខ្ញុំថាចង់ទៅកម្សាន្តនៅទីក្រុង Cancun ប្រទេសម៉ិកស៊ីកូ ឬទៅលេងជីដូនជីតានៅស្រុកកំណើត? គេប្រាកដជានឹងជ្រើសយកជម្រើសខាងក្រោយនេះ។
ថ្វីបើចូលចិត្តធ្វើការងារកសិកម្មជាប្រចាំថ្ងៃ ប៉ុន្តែ Savinho មានទេពកោសល្យខាងលេងបាល់ទាត់។ អ្នកស្រី Dona Nilma បានរំឭកថា កាល Savinho ទើបមានអាយុ៥ឆ្នាំ មានគ្រូបាល់ទាត់ក្នុងស្រុកម្នាក់បាននិយាយប្រាប់អ្នកស្រីថា Savinho នឹងក្លាយជាកីឡាករបាល់ទាត់នាពេលអនាគត។
ដំបូង Savinho ផ្ដើមលេងបាល់ទាត់លើឆ្នេរខ្សាច់ ហើយបន្ទាប់មកបានប្ដូរមកលេងបាល់ទាត់លើស្មៅវិញ។ ភ្លាមនោះ គេក៏បានក្លាយជាគោលដៅរ៉ាដារបស់ក្រុមធំៗក្នុងប្រទេស។ ទីបំផុត ក្លឹបយក្សមួយរបស់ប្រេស៊ីល Atletico Mineiro បានចុះកិច្ចសន្យាយក Savinho ចូលក្រុមយុវជនថ្នាលរបស់ពួកគេ បន្ទាប់ពីក្មេងម្នាក់នេះបានបង្ហាញសមត្ថភាពយ៉ាងទាក់ភ្នែកទល់នឹងក្រុម U17 Atletico Mineiro នៅខណៈដែល Savinho ទើបមានអាយុ១១ឆ្នាំប៉ុណ្ណោះ។ ខ្សែប្រយុទ្ធស្លាបជំនាញជើងឆ្វេងរូបនេះបានវិវឌ្ឍខ្លួនយ៉ាងរហ័ស ហើយក្លាយជាកីឡាករវ័យក្មេងបំផុតដែលបានចូលលេងសម្រាប់ក្រុមធំ Atletico Mineiro ក្នុងលីគប្រេស៊ីល នៅក្នុងវ័យត្រឹម១៦ឆ្នាំ។ ហើយនៅវ័យ១៨ឆ្នាំ គេបានក្លាយជាកីឡាករក្មេងបំផុតដែលរកបានគ្រាប់បាល់សម្រាប់ Atletico Mineiro ក្នុងការប្រកួត Copa Libertadores។
ការរះឡើងយ៉ាងលឿនរបស់ Savinho បានទាក់ទាញ City Football Group ដែលជាក្រុមហ៊ុនមេរបស់ក្លឹបធំៗជាច្រើនដូចជា Manchester City, New York City, Troyes, Girona, Lommel, Melbourne City, Palermo និងក្លឹបជាច្រើនផ្សេងទៀត ឱ្យទិញ Savinho ពី Atletico Mineiro ក្នុងតម្លៃ១២,៥លានអឺរ៉ូ (១៣,៦លានដុល្លារ) ក្នុងឆ្នាំ២០២២ ដោយប្រជែងឈ្នះ Arsenal ហើយយកទៅបញ្ចូលជាសមាជិកក្លឹប Troyes ក្នុងលីគកំពូលបារាំង។ ប៉ុន្តែ Savinho ពុំបានលេងឱ្យ Troyes ទេ ដោយត្រូវបានផ្ទេរឱ្យក្លឹប PSV Eindhoven ខ្ចីក្នុងរដូវកាល២០២២-២៣ រួចបន្តឱ្យ Girona ខ្ចីក្នុងរដូវកាល២០២៣-២៤។
គ្រាន់តែឃើញការហ្វឹកហាត់លើកដំបូងរបស់ Savinho នៅ Girona ភ្លាមក្នុងរដូវក្ដៅ២០២៣ អ្នកចាត់ការ Girona លោក Michel Sanchez លង់ចិត្តស្រឡាញ់និងជឿជាក់លើទេពកោសល្យរបស់ Savinho ភ្លែត។ លោក Michel បាននិយាយទៅកាន់នាយកកីឡា Quique Carcel ថាពួកយើងនឹងបញ្ចប់រដូវកាល La Liga 2023-24 ក្នុងលំដាប់ Top 8។ ដោយសារតែ Girona ជាក្រុមតូចមិនសូវសម្បូរថវិកានិងធនធានកីឡាករល្បីៗធៀបនឹងក្លឹបធំៗដទៃក្នុងលីគកំពូលអេស្ប៉ាញ លោកនាយកកីឡា Carcel បានតបទៅលោកគ្រូ Michel ក្នុងរបៀបហួសចិត្តថា «លោកគ្រូក្ដៅខ្លួនឬអ្វី»?
តែលទ្ធផលជាក់ស្ដែងចេញមក គឺល្អហួសពីការរំពឹងទុករបស់លោកគ្រូ Michel ទៅទៀត ដោយ Girona បានប្រដេញពិន្ទុជាមួយ Real Madrid និង Barcelona អស់រយៈពេលយ៉ាងយូរ នៅទីកំពូលតារាង មុននឹងបញ្ចប់រដូវកាលក្នុងចំណាត់ថ្នាក់ទី៣ បានកៅអី UEFA Champions League 2024-25 ដែលជាសមិទ្ធផលអស្ចារ្យបំផុតក្នុងប្រវត្តិសាស្ត្រ៩៣ឆ្នាំនៃការកកើតក្លឹបនេះ។
លោកគ្រូ Michel និយាយថា លោកដឹងថាអ្វីដែលលោកអះអាងគឺមានលក្ខណៈហ៊ានជ្រុលបន្តិច ប៉ុន្តែលោកថាតាំងពីជំនាន់ Vinicius Junior មក លោកពុំដែលឃើញកីឡាករណាពូកែក្នុងស្ថានភាព១ទល់១ដូច Savinho ទេ។ លោកថា កីឡាករដូច Bellingham ល្បីនិងមានគេស្គាល់ច្រើនស្រាប់ហើយ តែសម្រាប់ Savinho ដែលចេញពីស្ថានភាពមិនសូវមានអ្នកចាប់អារម្មណ៍ លោកនិយាយថាគេជាកីឡាករដ៏គួរឱ្យភ្ញាក់ផ្អើលបំផុតក្នុង La Liga រដូវកាលកន្លងទៅ។
Savinho កម្ពស់១ម៉ែត្រ៧៦ស.ម រកបាន១១គ្រាប់ និងអាស៊ីស១០លើកសម្រាប់ Girona រដូវកាលមុន។ គេមានល្បឿនដ៏លឿនជាមួយបាល់។ គេបានឡើងកូដរហូតជាប់ជម្រើសជាតិក្រុមធំប្រេស៊ីលក្នុងខែមីនា២០២៤ និងបានបង្ហាញខ្លួនក្នុងការប្រកួតមិត្តភាពទល់នឹងអង់គ្លេសនៅ Wembley។ ក្នុងព្រឹត្តិការណ៍ Copa America 2014 Savinho បានជាប់ក្នុងបញ្ជីចុងក្រោយប្រេស៊ីល និងបានលេង ហើយរកបានគ្រាប់បាល់១គ្រាប់ផងដែរ ក្នុងជ័យជម្នះវគ្គចែកពូល៤-១លើប៉ារ៉ាហ្គាយ ដែលជាគ្រាប់ដំបូងរបស់គេសម្រាប់ប្រេស៊ីល។
អ្នកចាត់ការ Man City លោក Pep Guardiola មុខជាសង្ឃឹមថាអាចទាញបានសមត្ថភាពពីសក្ដានុពលរបស់ Savinho។ លេងនៅ Premier League និងក្រោមការបង្វឹករបស់លោក Guardiola ច្បាស់ណាស់ថាមិនងាយស្រួលទេសម្រាប់ Savinho ប៉ុន្តែខ្សែប្រយុទ្ធស្លាបវ័យក្មេងដែលមានប្រភពចេញពីត្រកូលកសិករជនបទប្រេស៊ីលរូបនេះនឹងមិនរួញរាឡើយ។ គេកំពុងបំពេញក្ដីស្រមៃរបស់គេ៕
