ភ្នំពេញ៖ នៅថ្ងៃបើកឆាកនៃការប្រកួតពានរង្វាន់ SAMDECH MOHA BORVOR THIPADEI 2024-SEA V LEAGUE CHALLENGE ក្រុមបាល់ទះជម្រើជាតិកម្ពុជា ត្រូវជាមួយក្រុមជម្រើសជាតិម៉ាឡេស៊ី។
ប្រវត្តិខ្លះនៃក្រុមទាំងពីរដែលធ្លាប់ជួបគ្នាកាលពីពេលកន្លងមក មានទាំងការជួបគ្នាព្រឹត្តិការណ៍ស៊ីហ្គេម និងក្នុងការប្រកួតពានរង្វាន់ Tri-Nation។
នៅក្នុងព្រឹត្តិការណ៍ស៊ីហ្គេម ឆ្នាំ២០១៧ ដែលម៉ាឡេស៊ីធ្វើជាម្ចាស់ផ្ទះ ហើយស្ថិតនៅក្នុងពូលA ក្នុងនោះរួមមាន កម្ពុជា វៀតណាម និងហ្វីលីពីន។ ម៉ាឡេស៊ី បានយកឈ្នះ កម្ពុជា ៣សិត ទល់និង០ ដោយឈ្នះក្នុងពិន្ទុ សិតទីមួយ25-18, សិតទីពីរ30-28 និងសិតទីបី25-17.។
សម្រាប់ការជួបគ្នាក្នុងការប្រកួតពានរង្វាន់ Tri-Nation ឆ្នាំ២០២៣ ដែលម៉ាឡេស៊ីធ្វើជាម្ចាស់ផ្ទះ ហើយមានបួនក្រុមចូលរួម ក្នុងនោះមាន កម្ពុជា សឹង្ហបូរី ក្រុមជម្រើសជាតិម៉ាឡេស៊ី និងម៉ាឡេស៊ីឈុតB។ ប្រកួតដំបូងក្រុមជម្រើសជាតិម៉ាឡេស៊ី បានយកឈ្នះ ក្រុមកម្ពុជា ៣សិត ទល់និង០ ក្នុងលទ្ធផល សិតទីមួយ ២៨-២៦ សិតទីពីរ ២៥-២១ និងសិតទីបី ២៥-១២។ ចំពោះវិញ្ញាសារបាល់ទះនៅក្នុងព្រឹត្តិការណ៍ស៊ីហ្គេមដែលគិតចាប់តាំងពីឆ្នាំ១៩៧៧ ក្រុមបាល់ទះជម្រើសជាតិម៉ាឡេស៊ីឈ្នះមេដាយប្រាក់ នៅឆ្នាំ២០០១ ដែលខ្លួនធ្វើជាម្ចាស់ផ្ទះព្រឹត្តិការណ៍ស៊ីហ្គេម។
ចំឯកម្ពុជាវិញ ឈ្នះមេដាយសំរិទ្ធ នៅក្នុងព្រឹត្តិការណ៍ស៊ីហ្គេម ឆ្នាំ២០២១ ដែលវៀតណាមធ្វើជាម្ចាស់ផ្ទះ ហើយមេដាយប្រាក់នៅឆ្នាំ២០២៣ ដែលកម្ពុជាខ្លួនឯងធ្វើជាម្ចាស់ផ្ទះព្រឹត្តិការណ៍ស៊ីហ្គេម។
នៅថ្ងៃសុក្រ ទី៣០ ខែសីហា ឆ្នាំ២០២៤ ម៉ោង៦ល្ងាច នៅសាលបាល់ទះនៃពហុកីឡដ្ឋានអូឡាំពិក ក្រុមទាំងពីរត្រូវជួបម្ដងទៀត ក្នុងពានរង្វាន់ SAMDECH MOHA BORVOR THIPADEI 2024-SEA V LEAGUE CHALLENGE មួយគូទៀតនោះគឺ ក្រុមជម្រើសជាតិឡាវ ត្រូវជួបជាមួយក្រុមជម្រើសជាតិសឹង្ហបូរី នៅម៉ោង៤រសៀល៕
