អ្នកចាត់ការ Liverpool លោក Arne Slot បានបង្ហាញការយល់ឃើញចំពោះការបង្ហាញសមត្ថភាពពុំសូវបានល្អរបស់ Trent Alexander-Anold ក្នុងការប្រកួតដែលក្រុមរបស់លោក ស្មើ Manchester United 2-2 ខណៈដែលខ្សែការពារស្លាបស្ដាំរូបនេះ មានការភ្ជាប់ទៅនឹងក្លឹបយក្សអេស្ប៉ាញ Real Madrid។
បន្ទាប់ពីបញ្ចប់វគ្គទី១ដោយគ្មានគ្រាប់បាល់ ក្រុមភ្ញៀវ Man Utd រកគ្រាប់នាំមុខដោយខ្សែការពារ Lisandro Martinez ដែលគេចផុតពីការរារាំងរបស់ Alexander-Arnold ហើយស៊ុតបាល់រំលងអ្នកចាំទី Alisson ក្នុងនាទីទី៥២ តែក្រុមម្ចាស់ផ្ទះមានឱកាសវាយបកនាំមុខពីគ្រាប់បាល់របស់ Cody Gakpo និង Mohamed Salah ក្នុងនាទីទី៥៩ និង៧០ មុនពេល Amad Diallo តាមស្មើមួយគ្រាប់វិញ ក្នុងនាទីទី៨០ ដែលចាប់ផ្ដើមពីកំហុសរបស់ Alexander-Arnold ផងដែរ។
ខ្សែការពារស្លាបស្ដាំជម្រើសជាតិអង់គ្លេស រួមជាមួយមិត្តរួមក្រុម Salah និង Virgil Van Dijk នៅសល់កុងត្រាជាមួយ Liverpool ត្រឹមដំណាច់រដូវកាលនេះប៉ុណ្ណោះ ហើយកីឡាករអង់គ្លេស គឺជាគោលដៅចម្បងសម្រាប់ក្លឹបអធិរាជស ដើម្បីមកបំពេញតំណែងការពារស្លាបស្ដាំ ក្រោយ Dani Carvajal អវត្តមានរយៈពេលវែង ដោយសារបញ្ហារបួស។
មានការរាយការណ៍ថា Real Madrid បានទាក់ទងអ្នកតំណាងរបស់ Alexander-Arnold នាទីផ្សារដោះដូរខែមករានេះ ប៉ុន្ដែអ្នកចាត់ការ Liverpool លោក Slot បានអះអាងមុនជំនួបទល់ Man United កាលពីថ្ងៃអាទិត្យថា ខ្សែការពារស្លាបវ័យ២៦ឆ្នាំ មានការប្រឹងប្រែងឱ្យអស់លទ្ធភាពសម្រាប់ក្រុម ទោះបីជាគេសាងកំហុស កាលពីយប់មិញក៏ដោយ។
អ្នកចាត់ការជនជាតិហុល្លង់បាននិយាយថា៖ “ខ្ញុំមិនជឿលើរឿងទាំងនោះទេ។ ខ្ញុំគិតថា មាន៩នាក់ក្នុងចំណោម១០នាក់ទៅហើយដែលប្រាប់អ្នកថា បញ្ហានេះបានធ្វើឱ្យប៉ះពាល់ដល់អារម្មណ៍របស់គេ ប៉ុន្ដែខ្ញុំជាម្នាក់នៃ១០នាក់ ដែលគិតថា វាមិនប៉ះពាល់ដល់គេ។
“អ្វីដែលខ្ញុំគិតថាប៉ះពាល់ដល់គេនោះគឺ គេលេងទល់ Bruno Fernandes និង Diogo Dalot ដែលជាជម្រើសដំបូងរបស់ក្រុមបាល់ទាត់ជម្រើសជាតិព័រទុយហ្កាល់ ជាកីឡាករដ៏អស្ចារ្យ”។
“ខ្ញុំគិតថាអ្វីដែលជាការលំបាកសម្រាប់ Trent គឺការលេងទល់ Bruno Fernandes និង Diogo Dalot ជាងចចាមអារ៉ាម កន្លងមកប៉ុន្មានសប្ដាហ៍នេះ។ នេះជាអ្វីដែលខ្ញុំគិត ប៉ុន្ដែគ្រប់គ្នាប្រហែលជាប្រាប់អ្នកថា បញ្ហាគឺដោយសារតែរឿងចចាមអារ៉ាម”។
លទ្ធផលស្មើគ្នាក្នុងការប្រកួតនេះ ធ្វើឱ្យ Liverpool បន្ដនាំមុខលើកំពូលតារាងមានគម្លាតនាំមុខក្រុមលេខ២ Arsenal, ៦ពិន្ទុ តែសល់មួយប្រកួតក្នុងដៃ តែអ្នកគាំទ្រទំនងជាមិនអស់ចិត្តដោយសាររបូតគ្រាប់បាល់ចុងម៉ោង ដែលនាំឱ្យពួកគេបាត់បង់ពីរពិន្ទុ។ ចំពោះលទ្ធផលនេះ លោក Slot បានបន្ថែមថា៖ “ពិតណាស់ វាមានអារម្មណ៍ថា យើងបាត់បង់ពីរពិន្ទុ។ ខ្ញុំគិតថា អ្វីដែលមនុស្សជាច្រើនគិតនោះគឺលទ្ធផលពេលចប់ការប្រកួត និងឱកាសដ៏ធំមួយរបស់ Maguire ប៉ុន្ដែខ្ញុំគិតថា ពួកគេភ្លេចអំពីថាពេលនោះគឺពីរនាទីក្រោយពេល Virgil មានឱកាសដ៏ធំក្នុងការរកគ្រាប់បាល់នាំមុខ ៣-២។ ទីបំផុតទៅ វាជាការប្រកួតដ៏លំបាកមួយ ស្រដៀងទៅនឹងការលេងទល់ Nottingham Forest ដោយក្រុមទាំងពីរលេងបែបការពារ ដែលប្រើរាងកាយរារាំងច្រើន។ វាមិនងាយស្រួលទេ ក្នុងការលេងទល់នឹងរបៀបលេងបែបនេះ”៕
