មុនពេលដែលព័រទុយហ្គាល់ត្រូវប្រកួតក្នុងជំនួបដំបូងរបស់ខ្លួន រូបរាងកាយរបស់ Cristiano Ronaldo បានក្លាយជាប្រធានបទដ៏ក្តៅគគុកមុនគេបាត់ទៅហើយ។
ព័រទុយហ្គាល់នឹងត្រូវប្រកួតបើកឆាកទល់នឹងក្រុមជម្រើសជាតិកុងហ្គោ (DR Congo) ក្នុងជំនួបពូល K នៃពានរង្វាន់ ‘2026 FIFA World Cup’ នៅកីឡដ្ឋាន Houston Stadium ក្នុងរដ្ឋតិចសាស់ សហរដ្ឋអាមេរិក នៅថ្ងៃទី១៨ វេលាម៉ោង ១២ យប់ (ម៉ោងនៅកម្ពុជា)។
នៅក្នុងការប្រកួតដំបូងរបស់ព័រទុយហ្គាល់ ការចាប់អារម្មណ៍ខ្លាំងបំផុតនៅតែបន្តធ្លាក់ទៅលើ Ronaldo។ កើតក្នុងឆ្នាំ ១៩៨៥ ខ្សែប្រយុទ្ធរូបនេះនឹងបង្ហាញខ្លួននៅលើឆាក World Cup ក្នុងវ័យ ៤១ ឆ្នាំពេញ នៅក្នុងព្រឹត្តិការណ៍ឆ្នាំនេះ។
មុនពេលការប្រកួតមកដល់ អ្វីដែលបានផ្ទុះឡើងនៅលើបណ្តាញអ៊ីនធឺណិតមុនគេ គឺរូបរាងកាយរបស់ Ronaldo។ ថ្មីៗនេះ រូបភាពរបស់លោកត្រូវបានគេប្រទះឃើញពេលកំពុងសម្រាកលំហែកាយជាមួយមិត្តរួមក្រុមជម្រើសជាតិព័រទុយហ្គាល់ នៅឆ្នេរសមុទ្រ Palm Beach ក្នុងរដ្ឋផ្លរីដា ហើយក្នុងនោះ រូបរាងដ៏ពោរពេញដោយសាច់ដុំរបស់ Ronaldo បានទាក់ទាញខ្សែភ្នែកមនុស្សជាច្រើន។ ដោយសារតែរូបរាងកាយដ៏រឹងមាំដែលមិនគួរឱ្យជឿថាជាមនុស្សវ័យ ៤០ឆ្នាំ បែបនេះ ទើបមានការលេងសើច និងសង្ស័យថាជារូបភាពដែលបានឆ្លងកាត់ការកាត់ត (Photoshop)។
ជុំវិញរឿងនេះ មិត្តរួមក្រុមជម្រើសជាតិព័រទុយហ្គាល់ Vitinha បានចេញមុខឆ្លើយតបដោយផ្ទាល់។ នៅក្នុងសន្និសីទសារព័ត៌មាននៅឯគម្រោងបោះជំរុំហ្វឹកហាត់របស់ក្រុមជម្រើសជាតិព័រទុយហ្គាល់ ដែលធ្វើឡើងនៅឆ្នេរ Palm Beach នោះ Vitinha បានលាន់មាត់សរសើរថា៖ «វាមិនមែនជារូបភាពដែលកាត់តតាម Photoshop ទេ គឺជារូបពិតប្រាកដ» លោកបានបន្តថា៖ «វាជារឿងគួរឱ្យភ្ញាក់ផ្អើលណាស់ដែលគាត់នៅតែអាចរក្សារូបរាងបែបនេះបានក្នុងវ័យ ៤១ឆ្នាំ។ ខ្ញុំមានអាយុទើបតែ ២៦ឆ្នាំសោះ ប៉ុន្តែខ្ញុំមិនអាចធ្វើបានដូចគាត់ឡើយ»។
សម្រាប់ Ronaldo ព្រឹត្តិការណ៍លើកនេះ គឺជាការចូលរួមប្រកួត World Cup លើកទី៦ នៅក្នុងប្រវត្តិការងារបាល់ទាត់របស់លោក។ លោកបានឈានជើងចូលប្រកួត World Cup តាំងពីឆ្នាំ ២០០៦ នៅប្រទេសអាល្លឺម៉ង់មកម្ល៉េះ ហើយចាប់តាំងពីពេលនោះមក លោកបានក្លាយជាមុខមាត់របស់បាល់ទាត់ព័រទុយហ្គាល់អស់រយៈពេលយ៉ាងយូរ។ ទោះបីជាលោកបានសាងសមិទ្ធផលជាច្រើនដូចជា ការឈ្នះពានរង្វាន់អឺរ៉ុប (Euro), ឈ្នះពានរង្វាន់ UEFA Champions League និងពានរង្វាន់ Ballon d’Or ក៏ដោយ ប៉ុន្តែពានរង្វាន់ World Cup គឺជាពានតែមួយគត់ដែលលោកមិនទាន់បានលើកនៅឡើយ។
ព័រទុយហ្គាល់នាពេលបច្ចុប្បន្នត្រូវបានគេវាយតម្លៃថា ជាក្រុមដែលមានតំបន់បម្រើដ៏ខ្លាំងក្លា និងពោរពេញដោយទេពកោសល្យ តាមរយៈការផ្លាស់ប្តូរជំនាន់កីឡាករថ្មីៗដូចជា Bruno Fernandes, Bernardo Silva, Vitinha និង João Neves ជាដើម។ ស្ថិតក្រោមការដឹកនាំរបស់គ្រូបង្វឹកលោក Roberto Martínez ព័រទុយហ្គាល់ត្រូវបានគេចាត់ទុកថាជាក្រុមមួយក្នុងចំណោមក្រុមដែលមានឱកាសប្រជែងពានរង្វាន់ម្តងទៀត។ ថាតើ Ronaldo នឹងត្រូវដើរតួនាទីបែបណានៅក្នុងក្រុមជម្រើសជាតិ ក៏ជាចំណុចទស្សនាដ៏សំខាន់មួយផងដែរ។
ចំណែកឯគូប្រកួតដំបូងគឺ DR Congo ក៏មិនអាចមើលស្រាលបានឡើយ។ DR Congo បានត្រលប់មកកាន់ឆាក World Cup សាជាថ្មីក្រោយខកខានអស់រយៈពេល ៥២ឆ្នាំ បន្ទាប់ពីធ្លាប់បានចូលរួមប្រកួតកាលពីឆ្នាំ ១៩៧៤ ក្រោមឈ្មោះប្រទេស ហ្សៀ (Zaire)។ នេះជាលើកដំបូងហើយដែលពួកគេបានមកដល់វគ្គផ្តាច់ព្រ័ត្រ World Cup ក្រោមឈ្មោះប្រទេសបច្ចុប្បន្ន។ បើទោះបីជាការវាយតម្លៃជារួមបង្ហាញថា ព័រទុយហ្គាល់មានប្រៀបជាងក៏ដោយ ប៉ុន្តែសម្ពាធនៃការប្រកួតដំបូងរបស់ World Cup និងការតស៊ូរបស់ក្រុមដែលរងការវាយតម្លៃទាប (Underdog) អាចជារឿងដែលមើលរំលងមិនបាន។
សូមបញ្ជាក់ថា នៅក្នុងពូល K ក្រៅពីព័រទុយហ្គាល់ និង DR Congo ក៏មានក្រុមជម្រើសជាតិកូឡុំប៊ី និងអ៊ូសបេគីស្ថាន ផងដែរ។ សម្រាប់ព័រទុយហ្គាល់ ការទទួលបាន ៣ពិន្ទុក្នុងការប្រកួតដំបូង គឺជារឿងចាំបាច់បំផុតដើម្បីធានាបាននូវដំណើរការប្រកួតប្រកបដោយស្ថិរភាពនៅក្នុងវគ្គចែកពូលនេះ។
