ការប្រកួតជម្រុះ FIFA World Cup 2022 រវាងម្ចាស់ផ្ទះប្រេស៊ីលនិងអាហ្សង់ទីន ត្រូវបានបោះបង់ចោល ៥នាទីក្រោយកែបាល់

ការប្រកួតជម្រុះ FIFA World Cup 2022 រវាងម្ចាស់ផ្ទះប្រេស៊ីលនិងអាហ្សង់ទីន ត្រូវបានបោះបង់ចោល ៥នាទីក្រោយកែបាល់ ដោយសារមន្ត្រីសុខាភិបាលប្រេស៊ីលចូលទៅអន្តរាគមន៍ ដោយថាខាងក្រុមភ្ញៀវបានបំពានវិធានការប្រឆាំងកូវីដ១៩។ មន្ត្រីសុខាភិបាលប្រេស៊ីលថាកីឡាករអាហ្សង់ទីន៤នាក់ដែលលេងនៅលីគអង់គ្លេស ត្រូវធ្វើចត្តាឡីស័កក្នុងរយៈពេលកំណត់មុនអាចលេងបាន។ ទោះមិនបញ្ជាក់ឈ្មោះ តែគេអាចដឹងបាន ៤នាក់នោះគឺ Emiliano Buendia និង Emiliano Martinez របស់ក្លិប Aston Villa និង Giovani lo Celso និង Cristian Romero របស់ Tottenham Hotspur។ ក្នុងចំណោមនេះ ជាប់ជម្រើស១១នាក់៣នាក់ លើកលែងតែ Buendia។ ទាំងសហព័ន្ធកីឡាបាល់ទាត់អាហ្សង់ទីននិងសហព័ន្ធប្រេស៊ីលបានរិះគន់ពេលវេលានៃចំណាត់ការ ដោយថាមុនប្រកួតមិនដោះស្រាយឱ្យហើយ បែរជាមកពេលកំពុងប្រកួតធ្វើឱ្យខាតកីឡា។