ជារដូវកាលទី១សម្រាប់ខ្សែប្រយុទ្ធជនជាតិកាណាដា Alessandro Riggi មកប្រកបអាជីពកីឡាបាល់ទាត់នៅកម្ពុជា ដោយចូលរួមជាមួយអង្គរថាយហ្គឺរនៃក្របខណ្ឌ Cambodian Premier League។
AMS Sports បានឆ្លើយឆ្លងជាមួយកីឡាករវ័យ៣០ឆ្នាំរូបនេះពីដើមដែលរូបគេឈានជើងមកកាន់កម្ពុជា និងបទពិសោធទទួលបានក្នុងរដូវកាលដំបូង ក៏ដូចជាផែនការនាពេលខាងមុខ។
១. AMS Sports ៖ ហេតុអ្វីបានជាអ្នកសម្រេចចិត្តមកប្រកបអាជីពនៅកម្ពុជា?
ខ្ញុំចង់សាកល្បងអ្វីដែលថ្មី លើទឹកដីអាស៊ី។
២. AMS Sports ៖ តើអ្នកធ្លាប់ស្គាល់ប្រទេសកម្ពុជាឬទេពីមុន ហើយបានដឹងពីអ្វីខ្លះនៅទីនេះ ក៏ដូចជាកីឡាបាល់ទាត់ខ្មែរដែរ?
ខ្ញុំបានដឹងខ្លះដែរ តែមិនច្រើនទេ។ ខ្ញុំមិនបានស្វែងយល់អ្វីច្រើនទេ។ ខ្ញុំមានមិត្តរបស់ខ្ញុំដែលលេងនៅទីនេះ ហើយខ្ញុំបានសួរគាត់អំពីក្រុង ហើយគាត់បានប្រាប់ខ្ញុំថា គាត់ពេញចិត្តណាស់ គាត់ពិតនិយាយត្រូវមែន!
៣. តើមានឧបសគ្គអ្វីខ្លះទេក្នុងរដូវកាលដំបូងរបស់អ្នកទេ?
ឧបសគ្គច្រើនដែរ! កម្ដៅគឺជាអ្វីដែលត្រូវសម្របខ្លួន ហើយខ្ញុំក៏ត្រូវជិះម៉ូតូជាលើកដំបូងដែរ ។ ការផ្លាស់ប្តូរគ្រូបង្វឹកក្រោយលេងបាន៤ប្រកួត ក៏ជារឿងដែលយើងត្រូវប្រឈម។
៤. តើអ្នកគិតយ៉ាងណាចំពោះ Tiger បន្ទាប់ពីចំណាយពេលមួយរដូវកាលជាមួយពួកគេ? តើអ្នកចូលចិត្តក្លឹប អ្នកគាំទ្រ និងទីតាំងដែលមានសក្តានុពលទេសចរណ៍មួយនេះដែរឬទេ?
ជាក្រុងដ៏អស្ចារ្យ មនុស្សរួសរាយរាក់ទាក់ និងចិត្តបាន។ ការរស់នៅមើលទៅងាយស្រួល និងសុខដុមខ្លាំងណាស់។ ខ្ញុំចូលចិត្តមិត្តរួមក្រុម និងកីឡដ្ឋាន។ ខ្ញុំពេញចិត្តការលេងនៅកីឡដ្ឋាន Hanuman ពេលយើងធ្វើជាម្ចាស់ផ្ទះ។
៥. ចុះមិត្តរួមក្រុមរបស់អ្នកវិញ? គិតថា អ្វីជាចំណុចល្អ និងចំណុចដែលពួកគេត្រូវកែតម្រូវ?
ពួកគេជាមិត្តរួមក្រុមដែលរួសរាយ និងល្អបំផុតដែលខ្ញុំមិនធ្លាប់មាន។ ពួកគេជាមនុស្សមានឆន្ទៈ ខិតខំអភិវឌ្ឍខ្លួន និងរៀនសូត្រជារៀងរាល់ថ្ងៃ។
៦. បន្ទាប់ពីមួយរដូវកាលនៅស្រុកខ្មែរ តើអ្នករៀនសូត្រអ្វីច្រើនទៀតពីប្រទេស និងកីឡាបាល់ទាត់នៅទីនេះ? ហើយការយកចិត្តទុកដាក់ពីប្រជាជនចំពោះអ្នកម៉េចដែរ? ចុះអាហារហូបចុក និងការស្នាក់នៅទីនេះវិញ?
ខ្ញុំចូលចិត្តម្ហូបនៅទីនេះ! ប្រជាជនធ្វើឱ្យខ្ញុំមានអារម្មណ៍ថា ដូចនៅផ្ទះខ្លួនឯងតាំងពីពេលមកដល់ដំបូងម្ល៉េះ។ និយាយពីកីឡាបាល់ទាត់វិញ ក៏មានមូលដ្ឋានគ្រឹះ និងក្រុមល្អមួយចំនួនដែរក្នុងលីគ។ ការលេង គឺលឿន ដូច្នេះអ្នកត្រូវតែមានកាយសម្បទាគ្រប់គ្រាន់ដើម្បីលេងនៅអាស៊ី។
៧. តើអ្នកធ្លាប់ណែនាំគ្រួសារ និងមិត្តភក្តិរបស់អ្នកឱ្យមកលេងប្រទេសកម្ពុជាទេ?
ខ្ញុំបាននិយាយរឿងហ្នឹងខ្លះដែរ។
៨. តើអ្នកចង់បន្តនៅកម្ពុជាទៀត ឬរកកន្លែងផ្សេងក្នុងតំបន់?
មិនអីទេសម្រាប់ខ្ញុំ វាអាស្រ័យទៅលើគម្រោងក្លិប និងតួនាទីរបស់ខ្ញុំនៅក្នុងគម្រោងនោះ។ ខ្ញុំចង់ឈ្នះជើងឯក និងបានលេង Champions League។
៩. បើចង់បន្តនៅកម្ពុជាវិញ តើពេញចិត្តលក្ខខណ្ឌបែបណា? ក្លឹបល្អជាងហ្នឹងដែលមានមហិច្ឆតាខ្ពស់ឬម៉េចដែរ?
បាទ ខ្ញុំចង់បន្តនៅកម្ពុជា។ ខ្ញុំសប្បាយចិត្តនៅ Tiger តែក៏បើកចំហរចំពោះគម្រោងរបស់ក្លឹបដែរ។ ខ្ញុំចូលចិត្តបរិយាកាសដែលមានប្រកបដោយគំនិតចង់ឈ្នះ។
Alessandro Riggi ផ្ដើមអាជីពបាល់ទាត់ក្នុងឆ្នាំ២០១០ លេងនៅក្រុម Montreal Impact Academyហើយក៏ធ្លាប់ទៅចូលរួមជាមួយក្រុម B របស់ celta vigo នៃប្រទេសអេស្ប៉ាញ ឆ្នាំ២០១២, ក្រុម Atletico ក្នុងប្រទេសព័រទុយហ្គាល់ និងក្រុមយុវជន Cluj ក្នុងប្រទេសរ៉ូម៉ានី បន្ថែមពីក្រុមមួយចំនួនទៀតក្នុងប្រទេសកំណើត។
គិតមកទល់ពេលនេះ គេរកបាន៥គ្រាប់សម្រាប់អង្គរថាយហ្គឺរ។ Riggi ក៏ជាកីឡាករមួយរូបនៃភ្នាក់ងារ Fides Football ដែលមានប្រភពនៅប្រទេសអាល្លឺម៉ង់។ ភ្នាក់ងារនេះដឹកនាំដោយអតីតខ្សែប្រយុទ្ធវិសាខា Evangelos Skraparas។
Fides Football ត្រូវបានបង្កើតឡើងជិត២ឆ្នាំមកហើយ និងបានធ្វើការទាក់ទងការផ្ទេរកីឡាករក្នុងប្រទេសថៃ, កម្ពុជា, អូស្ត្រាលី, អាល្លឺម៉ង់ និងលីបង់ ផងដែរ៕
