អតីតអ្នកប្រដាល់ Serafim Todorov ដែលជាអ្នកចុងក្រោយគេធ្លាប់ឈ្នះកំពូលអ្នកប្រដាល់អាមេរិក Floyd Mayweather បច្ចុប្បន្នកំពុងរស់នៅក្នុងជីវភាពលំបាក ដោយរកបានត្រឹមតែ៤៣៥ដុល្លារអាមេរិកប៉ុណ្ណោះក្នុងមួយខែ ពីការងារនៅរោងចក្រសាច់ក្រកនាប្រទេសកំណើតប៊ុលហ្គារី។ នេះបើយោងតាមសារព័ត៌មាន the Sun និងប្រភពផ្សេងៗទៀត។
Todorov បានយកឈ្នះ Mayweahter ក្នុងការប្រកួតវគ្គពាក់កណ្ដាលផ្ដាច់ព្រ័ត្រអូឡាំពិកនៅអាត្លង់តា សហរដ្ឋអាមេរិក កាលឆ្នាំ១៩៩៦។ កាលណោះ Weather វ័យ១៩ឆ្នាំនៅឡើយ ហើយមិនទាន់ក្លាយជាអ្នកប្រដាល់សកលអាជីពទេ។ ចំណែកលោក Todorov ពេលនោះមានវ័យ២៧ឆ្នាំ។
ក្នុងវគ្គផ្ដាច់ព្រ័ត្រលោក Todorov បានចាញ់អតីតអ្នកប្រដាល់ថៃ Somluck Kamsing យកបានត្រឹមមេដាយប្រាក់ប៉ុណ្ណោះ។
លោក Todorov ធ្លាប់ត្រូវបានទាក់ទងដោយក្រុម promotion អាមេរិកមួយដែរលើកិច្ចសន្យាដែលផ្ដល់ដល់លោកនូវទឹកប្រាក់យ៉ាងច្រើន ប៉ុន្តែលោកមានទំនុកចិត្តខ្ពស់លើខ្លួនឯងថា អាចបានការឧបត្ថម្ភច្រើនជាងហ្នឹងទៀតពីរដ្ឋាភិបាលប៊ុលហ្គារី។ ផ្ទុយទៅវិញ លោកមិនទទួលបានជោគជ័យឡើយ។ ក្រោយមកលោកចង់ប្ដូរទៅប្រកួតឱ្យជម្រើសជាតិទួកគីដែរ តែមិនបានសម្រេច។ លោក បានចូលនិវត្តន៍ក្នុងឆ្នាំ២០០៣។
លោកថា លោកទទួលបានថវិកាឧបត្ថម្ភពីរដ្ឋាភិបាលប៊ុលហ្គារីដែរ តែមិនគ្រប់គ្រាន់សម្រាប់ចិញ្ចឹមជីវិតទេ ដូច្នេះលោកត្រូវលក់ផ្ទះ និងបានចូលធ្វើការរោងចក្រយសាច់ក្រក៕
