ពីរសប្ដាហ៍បន្ទាប់ពីការចែកឋានរបស់ Diego Maradona ស្រាប់តែអតីតរៀមច្បងលោកម្នាក់ គឺលោក Alejandro Sabella បានទទួលមរណភាពដោយសារបញ្ហាបេះដូង កាលថ្ងៃអង្គារ ទី០៨ ខែធ្នូ ក្នុងវ័យ៦៦ឆ្នាំ។ លោក Sabella បានស្ថិតក្នុងមន្ទីរពេទ្យតាំងពីចុងខែវិច្ឆិកាមកទល់នឹងពេលអនិច្ចកម្ម។
អតីតខ្សែបម្រើ Sheffield United និង Leeds United រូបនេះធ្លាប់ជាប់ជម្រើសជាតិអាហ្សង់ទីនឆ្នាំ១៩៨៣ដល់១៩៨៤។ លោកក៏ធ្លាប់ដឹកនាំជម្រើសជាតិប្រទេសកំណើតមួយនេះពីឆ្នាំ២០១១ដល់ឆ្នាំ២០១៤ ដែលជាឆ្នាំអាហ្សង់ទីនឡើងផ្ដាច់ព្រ័ត្រ FIFA World Cup 2014 ដោយចាញ់ក្រុមជើងឯកអាល្លឺម៉ង់ ១ទល់នឹង០។ ក្រោយបរាជ័យនេះ លោកបានលាឈប់ពីតំណែងនៅថ្ងៃទី៣០ ខែកក្កដា ឆ្នាំដដែលនោះ។
សូមរំឭកថា លោក Sabella បានផ្ទេរពី River Plate មក Sheffield United ក្នុងឆ្នាំ១៩៧៨ បន្ទាប់ពីក្លិបអង់គ្លេសមួយនេះបរាជ័យក្នុងការតាមទិញ Maradona៕
