Arsenal ជួបកំណត់ត្រាអន់បំផុតមិនធ្លាប់មានក្នុងពេល៦១ឆ្នាំមកនេះ

Monghak Yong
11 មើល
0 នាទីអាន
- Advertisement -

ក្រោយ Granit Xhaka រងពិន័យកាតក្រហមក្នុងនាទី៥៦ដោយសារទង្វើហិង្សាលើទីលាន, ប្រធានក្រុម Pierre-Emerick Aubameyang តែតបាល់លើកចេញពីជ្រុងចូលទីខ្លួនឯងពេលព្យាយាមជួយការពារក្នុងនាទី៧៣ បណ្ដាលឱ្យ Arsenal ចាញ់ក្រុមកំពុងយ៉ាប់យ៉ឺន Burnley ០-១ ក្នុងទឹកដីខ្លួនឯង។

ក្រុម Arsenal បង្វឹកដោយលោក Mikel Arteta ពេលនេះបានបរាជ័យក្នុងទឹកដីខ្លួនឯងក្នុងលីគ៤ប្រកួតជាប់គ្នាជាលើកដំបូងតាំងពីឆ្នាំ១៩៥៩មក។

លោក Arteta និយាយថាកាតក្រហមរបស់ Xhaka ជារឿងមិនអាចទទួលយកបាន។

នេះជាជ័យជម្នះលីគកំពូលលើកទី១របស់ Burnley លើ Arsenal តាំងពីខែកញ្ញាឆ្នាំ១៩៧៤មក បញ្ចប់ភាពមិនឈ្នះ១៥ប្រកួតជាប់គ្នាទល់នឹងក្រុមកាំភ្លើងធំ(ស្មើ៤ ចាញ់១១)។

ការរកបានសរុប១០គ្រាប់ក្រោយចាប់ផ្ដើម Premier League ១២ប្រកួតរដូវកាលនេះ ជាតួលេខទាបបំផុតរបស់ Arsenal ក្នុងលីគកំពូលអង់គ្លេសតាំងពីរដូវកាល១៩៨១-៨២មក (៨គ្រាប់)។

តាំងពីលោក Arteta ចូលកាន់តំណែងអ្នកចាត់ការក្នុងខែធ្នូឆ្នាំ២០១៩មក Arsenal រងពិន័យកាតក្រហម៦ដងក្នុង Premier League ច្រើនជាងក្រុមដទៃទ្វេដង។

Arsenal ពេលនេះឈរលេខរៀងទី១៥ក្នុងលីគ ស្របពេល Burnley ឡើងផុតតំបន់ក្រហម មកឈរលេខរៀងទី១៧ នៅលើ Fulham ១ពិន្ទុ៕

Follow:
លោក យ៉ុង ម៉ុងហាក់ ជា ពិធីករ អ្នកអត្ថាធិប្បាយ និង ជាការីនិពន្ធព័ត៌មានកីឡា ដែលមាន បទពិសោធការងារនៅស្ថាប័នធំៗមួយចំនួនក្នុងប្រទេសកម្ពុជា ទាំងទូរទស្សន៍ និង វេបសាយ។ លោក ម៉ុងហាក់ បាននិងកំពុងបំពេញការងារជាអ្នកសារព័ត៌មានកីឡា១០ឆ្នាំមកហើយ ។ លោក មានចំណេះដឹងកីឡាទាំងជាតិនិងអន្តរជាតិយ៉ាងច្បាស់លាស់ និងបរិយាយប្រកបដោយវិជ្ជាជីវៈ។ សព្វថ្ងៃ​លោកជា​និពន្ធនាយកប្រចាំ AMS SPORTS៕