Bayern Munich បានប្រកាសលាគ្នាជាផ្លូវការហើយជាមួយខ្សែការពារសម្បូរបទពិសោធដ៏ជោគជ័យ៣រូប គឺ David Alaba, Javi Martinez និង Jerome Boateng។
កីឡាករទាំង៣ដែលជាកំផែងការពារដ៏រឹងមាំក្នុងយុគដ៏ជោគជ័យរបស់ Bayern រយៈកាល១ទសវត្សរ៍ចុងក្រោយនេះ នឹងចាកចេញពីក្លិបនៅពេលកិច្ចសន្យាផុតកំណត់ក្នុងខែមិថុនាឆ្នាំ២០២១។ ពួកគេត្រូវបានក្លិបយក្សអាល្លឺម៉ង់មួយនេះហៅថាជា Legend របស់ក្លិបជារៀងរហូត។
ខ្សែការពារជម្រើសជាតិអូទ្រីស Alaba ដែលនឹងឈានចូលវ័យ២៩ឆ្នាំនៅខែក្រោយ ត្រូវបានរាយការណ៍ថានឹងចុះកិច្ចសន្យាជាមួយក្លិបថ្មី Real Madrid។ គេបានរួមរស់ជាមួយ Bayern ក្នុងឆ្នាំ២០០៨ មុនឡើងចូលក្រុមធំតាំងពី២០១០មក។
ចំណែកខ្សែការពារអាល្លឺម៉ង់វ័យ៣២ឆ្នាំ Boateng និងខ្សែការពារអេស្ប៉ាញ Martinez វ័យ៣២ឆ្នាំដែរ មិនទាន់កំណត់គោលដៅបន្ទាប់នៅឡើយទេ។ អ្នកទាំង២នឹងឈានចូលវ័យ៣៣ឆ្នាំដូចគ្នានៅដើមខែកញ្ញាខាងមុខ។
មានការប៉ាន់ស្មានមួយថា Martinez ដែលបានផ្ទេរពី Bilbao មកចូលរួម Bayern ក្នុងឆ្នាំ២០១២ ទំនងផ្លាស់ទៅលេងក្នុងលីគអាមេរិក Major League Soccer ក្នុងពេលខាងមុខដ៏ខ្លី។
Boateng ដែលបានផ្លាស់ពី Manchester City មក Bayern ក្នុងឆ្នាំ២០១១ ធ្លាប់ត្រូវបានភ្ជាប់នឹងការចង់បានពីសំណាក់ក្លិបល្មមៗមួយចំនួននាពេលកន្លងមក។
កាលពីយប់ថ្ងៃអង្គារទី១៨ខែឧសភា Bayern ក៏បានប្រកាសផងដែរថាគ្រូជំនួយ២រូប គឺលោក Miroslav Klose និងលោក Hermann Gerland នឹងចាកចេញពីក្លិបនៅដំណាច់រដូវកាល២០២០-២១នេះ។
Bayern នឹងមានគ្រូបង្វឹកថ្មីសម្រាប់រដូវកាលក្រោយ គឺលោក Julian Nagelsmann។ គ្រូបង្វឹកវ័យ៣៣ឆ្នាំរូបនេះនឹងចូលស្នងតំណែងលោក Hansi Flick ចាប់ពីថ្ងៃទី១ខែកក្កដាឆ្នាំ២០២១ទៅ៕
