អ្នកនិយមការរត់ខ្ទង់១០០នាក់នឹងចូលរួមរត់ full marathon តែម្ដង ក្នុងព្រឹត្តិការណ៍ KKRC London Marathon 2024 ដែលប្រព្រឹត្តទៅក្នុងបរិវេណបុរីប៉េងហួតបឹងស្នោ ល្ងាចថ្ងៃអាទិត្យ ទី២១ ខែមេសា ឆ្នាំ២០២៤។
លោក ឃី សុភា អ្នករៀបចំព្រឹត្តិការណ៍ KKRC London Marathon 2024 ឱ្យដឹងថា ការៀបចំការប្រកួតនេះ គឺស្របពេលគ្នាទៅនឹងព្រឹត្តិការណ៍ London Marathon នាក្រុងឡុងដ៍ ប្រទេសអង់គ្លេស។ ដូច្នេះអ្នកដែលមិនបានទៅចូលរួមដោយផ្ទាល់នៅអង់គ្លេស អាចចុះឈ្មោះរត់លក្ខណៈ virtual នៅប៉េងហួតនេះបាន ព្រោះមានការទទួលស្គាល់ពីគណៈកម្មការ London Marathon ហើយក៏មានការចូលរួមសហការពីបុរីប៉េងហួតផងដែរ។
អ្នករៀបចំខាងលើបន្តថា អ្នកចូលរួមនឹងទទួលបានអាវយឺត និងមេដាយដែលត្រូវបានបញ្ជូនពីក្រុងឡុងដ៍តែម្ដង។ ក្រៅពីអ្នកចុះឈ្មោះទទួលបានវត្ថុអនុស្សាវរីយ៍ ក៏មានអ្នកចូលរួមរត់ដើម្បីដឹងពីគុណផលរបស់ខ្លួនដែរ។
នេះជាឆ្នាំទី៣ហើយដែល KKRC London Marathon 2024 ត្រូវបានរៀបចំឡើង បន្ទាប់ពីឆ្នាំ ២០២២ នៅបឹងកក់ និងឆ្នាំ២០២៣ នៅបឹងស្នោរដូចគ្នា។ សម្រាប់ចំនួនអ្នកចូលរួមបានកើនឡើងពីមួយឆ្នាំទៅមួយឆ្នាំ។
វេលាចាប់ផ្ដើម គឺម៉ោង៤ល្ងាច ហើយបរិវេណរត់ គឺ នៅនាឡិកា Big Ben នៃ PH Euro Park និង Eco Park៕
