សាលាកីឡាគុណធម៌ដែលមានលោកបណ្ឌិត សេង ប៊ុនសុង ជានាយកគ្រប់គ្រងបានបើកដំណើរការហើយនៅល្ងាចថ្ងៃអាទិត្យ ទី១៥ ខែធ្នូ ឆ្នាំ២០២៤ មានទីតាំងលើបណ្ដោយផ្លូវអង្គតាមិញ សង្កាត់កាកាប ខណ្ឌពោធិ៍សែនជ័យ។
សាលាកីឡាដ៏ពិសេសនេះមានថ្នាក់បង្ហាត់កីឡាតេក្វាន់ដូ គុនល្បុក្កតោ កីឡារាំ និងកីឡាជាច្រើន ដោយមានគ្រូៗជំនាញ ជាកីឡាករ កីឡាការិនីជម្រើសជាតិចូលរួមបង្ហាត់បង្ហាញ។
លោកបណ្ឌិត សេង ប៊ុនសុង នាយកគ្រប់គ្រងសាលាកីឡាគុណធម៌មានប្រសាសន៍ថា សាលានេះមិនផ្ដោតតែលើការបង្ហាត់អ្នកអាជីពប៉ុណ្ណោះទេ ពោលអ្នកនិយមហ្វឹកហាត់កីឡាដើម្បីសុខភាពក៏អាចចូលរួមបាន។ មិនតែប៉ុណ្ណោះ នៅពេលមានចំណង់ចិត្តកាន់តែខ្លាំងលើការហ្វឹកហាត់ ក៏អាចផ្លាស់ប្ដូរទៅជាការហ្វឹកហាត់លក្ខណៈអាជីពបាន ហើយអាចមានឱកាសក្លាយទៅជាគ្រូជំនួយ ឬគ្រូបង្វឹកថែមទៀត ប្រសិនបើមានទេពកោសល្យល្អ។
ទាក់ទងទៅនឹងការបង្ហាត់ក្មេងៗ និង យុវជនវិញ លោកបណ្ឌិត សេង ប៊ុនសុង សង្កត់ធ្ងន់ថា មិនត្រឹមបណ្ដុះបណ្ដាលលើជំនាញកីឡាប៉ុណ្ណោះទេ តែក៏ផ្ដោតលើគុណធម៌ សីលធម៌ មានរបៀបវិន័យទាំងការហ្វឹកហាត់ ការរស់នៅ និងប្រាស្រ័យទាក់ទងក្នុងសង្គម ពោលគឺក្លាយជាពលរដ្ឋល្អ។
