Real Madrid បានរបូតឱកាសឈ្នះពាន Spanish Super Cup បន្ទាប់ពីបរាជ័យ ៥-២ ក្រោមថ្វីជើងរបស់ Barcelona ក្នុងវគ្គផ្ដាច់ព្រ័ត្រកាលពីថ្ងៃអាទិត្យ នៅទឹកដីអារ៉ាប៊ី សាអ៊ូឌីត។
បរាជ័យនេះបានធ្វើឱ្យក្រុមដឹកនាំដោយលោក Carlo Ancelotti បាត់បង់ឱកាសឈ្នះពាន៧ក្នុងរដូវកាល ក្រោយក្លាយជាជើងឯក UEFA Super Cup និង FIFA Intercontinental Cup កាលពីថ្មីៗនេះ។
ថ្លែងក្រោយចប់ការប្រកួត លោក Ancelotti បានប្រាប់អ្នកសារព័ត៌មានថា៖ “យើងមានអារម្មណ៍សោកស្ដាយ និងខកចិត្ត។ ប៉ុន្ដែនេះគឺបាល់ទាត់ ហើយយើងចាកចេញជាមួយភាពសោកសៅ។ ភាពសោកសៅរបស់យើងមិនខុសពីអ្នកគាំទ្រទេ។ យើងពិតជាសូមទោស។ ប៉ុន្ដែយើងត្រូវតែសម្លឹងទៅមុខ ហើយត្រៀមខ្លួនសម្រាប់ប្រកួតបន្ទាប់ ដើម្បីស្ដារការលេងឱ្យប្រសើរដូចដែលយើងធ្លាប់ធ្វើបាន”។
គិតមកទល់បច្ចុប្បន្ន មានតែពីរក្រុមប៉ុណ្ណោះ ដែលអាចឈ្នះរាល់ពានរង្វាន់ដែលពួកគេប្រជែងក្នុងមួយរដូវកាល ទី១គឺក្រុម Barcelona ដឹកនាំដោយលោក Pep Guardiola ក្នុងឆ្នាំ២០០៩ ដោយបានឈ្នះ La Liga, Copa del Rey និង Spanish Super Cup ជាមួយ UEFA Super Cup និង Club World Cup មុនពេល Bayern Munich ដឹកនាំដោយលោក Hansi Flick បាន ឈ្នះរាល់ពានទាំងអស់ក្នុងឆ្នាំ២០២០។
ទោះយ៉ាងណាក្ដី Real Madrid នៅសល់ឱកាសក្នុងការប្រជែងពាន៤ផ្សេងទៀត រួមមាន La Liga, Copa del Rey, UEFA Champions League រួមជាមួយ FIFA Club World Cup ដែលបន្ថែមចំនួនចូលក្រុមចូលរួម នឹងប្ដូរមកលេងអំឡុងរដូវក្ដៅវិញ៕
