Dele Alli និង Lionel Messi ត្រូវបានភ្ជាប់នឹងការផ្ទេរទៅ Paris St Germain ក្រោយការតែងតាំងលោក Mauricio Pochettino ជាគ្រូបង្គោលថ្មីជំនួសលោក Thomas Tuchel។
ជាការឆ្លើយតបនៅក្នុងសន្និសីទសារព័ត៌មានមុនដឹកនាំប្រកួតដំបូងរបស់ខ្លួនទល់ Saint-Etienne ថ្ងៃពុធទី៦ខែមករាឆ្នាំ២០២១នេះ គ្រូបង្វឹកជនជាតិអាហ្សង់ទីនពុំទាន់និយាយអ្វីច្រើនឡើយ តែលោកសង្កត់ធ្ងន់ខ្លីយ៉ាងមានន័យថា[PSG ស្វាគមន៍កីឡាករឆ្នើមៗជានិច្ច]។
អតីតអ្នកចាត់ការ Espanyol, Southampton និង Tottenham Hotspur និយាយថា៖ «ក្លិបនីមួយៗគឺខុសគ្នា ដូច្នេះវាពិបាកក្នុងការប្រៀបធៀបគ្នា។ ខ្ញុំនឹងមិននិយាយពី Tottenham ទេ ព្រោះវាជាកន្លែងចាស់របស់ខ្ញុំ តែពេលនេះខ្ញុំផ្ដោត១០០%លើ PSG។ ពួកយើងក៏នឹងមិននិយាយអំពីការនាំចូលកីឡាករថ្មីៗនាពេលនេះដែរ ប៉ុន្តែនៅពេលអនាគតយើងនឹងអាចនិយាយពីរឿងនេះបាន។ កីឡាករឆ្នើមនឹងត្រូវបានស្វាគមន៍ជានិច្ចនៅ PSG»។
ពាក់ព័ន្ធនឹងការរៀបចំក្រុមវិញ លោក Pochettino និយាយថាប្រព័ន្ធលេងគឺគ្រាន់តែជាចំណុចចាប់ផ្ដើមប៉ុណ្ណោះ អ្វីដែលសំខាន់គឺចលនានិងការរៀបចំ។ លោកនឹងស្ដាប់ផងដែរយោបល់កីឡាករគ្រប់រូបដើម្បីបង្កើតរបៀបលេងមួយដែលគ្រប់គ្នាអាចសម្របខ្លួនបានល្អបំផុត៕
