ការប្រកួត Premier League ស្មើ១-១នៅទឹកដីខ្លួនឯងជាមួយ Fulham យប់ថ្ងៃអង្គារទី១៨ខែឧសភា ត្រូវបានលោក Ole Gunnar Solskjaer និយាយថានឹងជាការដាស់កីឡាករឱ្យភ្ញាក់ពីដេក មុនប៉ះ Villarreal ក្នុងវគ្គផ្ដាច់ព្រ័ត្រ Europa League សប្ដាហ៍ក្រោយ។
យប់មិញនេះ Edinson Cavani បានប្រើភាពឈ្លាសវៃនិងបច្ចេកទេសផ្ទាល់ខ្លួនស៊ុតបញ្ចូលទីយ៉ាងអស្ចារ្យពីចម្ងាយជាង៣៦ម៉ែត្រឱ្យ Man Utd នាំមុខ។ ប៉ុន្តែ Man Utd មិនអាចរកបានជ័យជម្នះនៅចំពោះមុខអ្នកគាំទ្រដែលវិលមក Old Trafford វិញជាថ្មីឡើយ ដោយត្រូវ Joe Bryan តែតតាមស្មើសម្រាប់ Fulham។
អ្នកគាំទ្រភាគច្រើនខានចូលទស្សនាផ្ទាល់ការប្រកួតលីគកំពូលអង់គ្លេសតាំងពីខែមីនាឆ្នាំ២០២០មកម្ល៉េះ ក្រៅតែពីទស្សនិកជនមួយចំនួនតូចដែលមានសំណាងបានចូលទស្សនាខ្លះៗនៅកីឡដ្ឋានមួយចំនួនក្នុងខែធ្នូឆ្នាំមុន។
នៅក្រោយការប្រកួត លោក Solskjaer និយាយថាលទ្ធផលនេះអាចជាការដាស់តឿនមួយឱ្យកីឡាករភ្ញាក់ខ្លួន ព្រោះពួកគេបានបញ្ចេញស្ទីលផ្ទាល់ខ្លួនច្រើនពេកនៅលើទីលានដើម្បីទាក់ទាញចំណាប់អារម្មណ៍ទស្សនិកជន។ លោកថានេះមិនមែនជារបៀបលេងរបស់ Man Utd ទេ។ Man Utd គួរធ្វើការបានប្រសើរជាងនេះ។ លោកបានលើកឧទាហរណ៍អំពីការប្រឹងលេងរបស់ Cavani គឺគេមិនលេងសើចលើទីលានទេ។ ក្នុងការប្រកួតបាល់ទាត់មិនអាចមានការបញ្ចេញស្ទីលបែបលេងសើចទេ។
Man Utd ត្រូវតតាំងនឹងក្រុមខ្លាំងអេស្ប៉ាញ Villarreal ក្នុងប្រកួតផ្ដាច់ព្រ័ត្រ Europa League នៅទីក្រុង Gdansk ប្រទេសប៉ូឡូញ នាថ្ងៃពុធទី២៦ខែឧសភាឆ្នាំ២០២១។ Villarreal លេងមិនដែលចាញ់ឡើយក្នុងពាននេះមកទល់ពេលនេះ។
តែមុននឹងដល់ការប្រកួតនោះ Man Utd ត្រូវប្រកួតបញ្ចប់រដូវកាល Premier League នៅទឹកដី Wolves នាថ្ងៃអាទិត្យទី២៣ខែឧសភា ខណៈ Fulham នឹងស្វាគមន៍ Newcastle ក្នុងការប្រកួតចុងក្រោយរបស់ពួកគេក្នុងលីគកំពូលអង់គ្លេស មុនវិលទៅលេងក្របខណ្ឌ Championship រដូវកាលក្រោយ៕
