វីរបុរសអាហ្សង់ទីនដ៏ល្បីល្បាញដែលបានឈ្នះពាន FIFA World Cup 1978 ព្រមទាំងឈ្នះស្បែកជើងមាសនិងបាល់មាសផ្ទាល់ខ្លួនប្រចាំ World Cup ឆ្នាំនោះ គឺលោក Mario Kempes បានផ្ដល់យោបល់ថា Lionel Messi គួរចេញពី Barcelona នៅរដូវក្ដៅ២០២១នេះ។
ហើយលោកថែមទាំងលើកក្លិប៣ដែល Messi គួរទៅចូលរួម គឺ Manchester City ឬ Paris St Germain ឬ Bayern Munich។
លោក Kempes វ័យ៦៦ឆ្នាំ ដែលជាម្ចាស់ពាន Ballon d’Or ១៩៧៨ផងនោះ ត្រូវបានស្រង់សម្ដីតាមសារព័ត៌មាន Sports Bild ថា៖ «Messi គួរធ្វើការជាថ្មីជាមួយ Guardiola, ឬក៏ទៅ PSG ឬ Bayern Munich។ មានក្លិបជាច្រើនដែលមានលុយឬមានកីឡាករល្អៗដើម្បីសម្រេចបានជោគជ័យ។ Bayern ជាជម្រើសភាគរយទាបជាងគេព្រោះពួកគេនឹងមិនចាយលុយសន្ធឹកសន្ធាប់បែបនេះលើប្រាក់ខែកីឡាករឡើយ»។
លោកបន្ថែមថា ឱកាសដែល Messi អាចឈ្នះ Champions League ជាថ្មីជាមួយ Barca គឺមានតិចតួច។ ក្នុងពេលប៉ុន្មានឆ្នាំចុងក្រោយនេះ Barca ឆាប់ធ្លាក់ពី Champions League។ ពួកគេកំពុងមានការលំបាកច្រើនក្នុងការកសាងក្រុមឈ្នះមួយថ្មីដោយសារបញ្ហាហិរញ្ញវត្ថុ។
គួរជម្រាបថា Messi នឹងឈានចូលវ័យ៣៤ឆ្នាំនៅចុងខែមិថុនាខាងមុខ។
ដោយឡែក លោក Kempes ជាអតីតកំពូលខ្សែប្រយុទ្ធល្អបំផុតម្នាក់ក្នុងទសវត្សរ៍១៩៧០។ លោកល្បីល្បាញខ្លាំងនៅក្លិប Rosario Central ក្នុងប្រទេសកំណើត និង Valencia របស់អេស្ប៉ាញ។ លោកបានលេងឱ្យជម្រើសជាតិអាហ្សង់ទីនពីឆ្នាំ១៩៧៣ដល់១៩៨២ បង្ហាញខ្លួន៤៣លើករកបាន២០គ្រាប់ និងឈ្នះពាន FIFA World Cup 1978។ លោករកបាន២គ្រាប់ម្នាក់ឯងក្នុងវគ្គផ្ដាច់ព្រ័ត្រឆ្នាំនោះដែលអាហ្សង់ទីនឈ្នះហុល្លង់៣-១។ លោកជាកីឡាករទី៣ក្នុងប្រវត្តិសាស្ត្រដែលបានឈ្នះពានទាំង៣ក្នុងព្រឹត្តិការណ៍ World Cup គឺលើកពាន World Cup ជាមួយក្រុមផង, ឈ្នះស្បែកជើងមាសផង និងឈ្នះបាល់មាសផង បន្ទាប់ពីវីរបុរសប្រេស៊ីល Garrincha ក្នុងឆ្នាំ១៩៦២ និងវីរបុរសអ៊ីតាលី Paolo Rossi ក្នុងឆ្នាំ១៩៨២៕
