ពេលវេលារបស់ Anthony Martial នៅ Manchester United អាចដល់ទីបញ្ចប់ក្នុងពេលអនាគតដ៏ខ្លី ដ្បិត Barcelona កំពុងឃ្លាំមើលស្ថានភាពខ្សែប្រយុទ្ធជម្រើសជាតិបារាំងរូបនេះនៅ Old Trafford។
តាំងពី Cristiano Ronaldo និង Jadon Sancho មកដល់ Man Utd ក្នុងរដូវក្ដៅ២០២១នេះ Martial កាន់តែធ្លាក់ទៅក្រោមក្នុងលំដាប់ជម្រើសខ្សែប្រយុទ្ធក្នុងក្រុមបិសាចក្រហម។
តាមសារព័ត៌មាន Mundo Deportivo លោក Xavi គ្រូបង្គោលថ្មី Barcelona ឱ្យតម្លៃចំពោះគុណភាពរបស់ Martial។
Martial បានផ្ទេរពី Monaco មក Man Utd ក្នុងខែកញ្ញាឆ្នាំ២០១៥ ក្នុងតម្លៃ៣៦លានផោនដែលធ្វើឱ្យគេក្លាយជាកីឡាករយុវជនថ្លៃបំផុតនៅពេលនោះ និងជាកីឡាករវ័យក្មេងលេចធ្លោបំផុតម្នាក់ក្នុងទ្វីបអឺរ៉ុប។
គេបានចូលលេងលើកដំបូងក្នុងរបៀបដ៏គួរឱ្យចងចាំមួយសម្រាប់ Man Utd ដោយអូសបាល់ដាច់កីឡាករ Liverpool ជាច្រើននាក់ រួចទាត់បញ្ចូលទីក្នុងជ័យជម្នះ៣-១របស់ក្រុមបិសាចក្រហម។ តែក្រោយជោគជ័យក្នុងរដូវកាលទី១ Martial បានចាប់ផ្ដើមធ្លាក់ចុះបន្តិចម្ដងៗទៅវិញ។
បើគិតទៅ មកទល់ពេលនេះ Martial បានឈ្នះពាន FA Cup, Europa League និង League Cup ជាមួយ Man Utd ប៉ុន្តែភាពសំខាន់របស់គេនៅទីនេះបានថយចុះពីមួយឆ្នាំទៅមួយឆ្នាំ។
Martial ថ្ងៃណាលេងល្អ គឺជាកីឡាករដ៏លឿនម្នាក់ដែលអាចបង្កភាពឈឺក្បាលដល់ខ្សែការពារ។ ពេលគេលេងល្អ គេជាកីឡាករម្នាក់ដែលលេងប្រកបដោយទំនុកចិត្ត ហើយគេធ្វើបានល្អបំផុតនៅពេលទទួលបានការជឿជាក់ពីគ្រូបង្វឹកនិងលេងបានទៀងទាត់។
ប្រសិនគេផ្ទេរទៅ Barcelona គេនឹងក្លាយជាដៃគូប្រយុទ្ធល្អមួយជាមួយអតីតខ្សែប្រយុទ្ធ Man Utd ជម្រើសជាតិហុល្លង់គឺ Memphis Depay ដែលសម្របខ្លួននៅកាតាឡូនីញ៉ាបានយ៉ាងល្អក្រោយចេញពី Lyon ដោយគ្មានតម្លៃផ្ទេរក្នុងរដូវក្ដៅ។
មូលហេតុមួយទៀតដែល Barcelona អាចនាំយក Martial ទៅគឺព្រោះគេប្រហែលជួយឱ្យមិត្តរួមជាតិបារាំង Ousmane Dembele ព្រមស៊ីញេកិច្ចសន្យាថ្មី។
Barcelona រងការរិះគន់យ៉ាងខ្លាំងចំពោះការនាំយក Luuk de Jong ពី Sevilla លើកិច្ចសន្យាខ្ចីក្នុងរដូវក្ដៅកន្លងទៅ៕
ប្រភព៖ Marca
