និពន្ធនាយកទស្សនាវដ្ដី France Football ដែលជាស្ថាប័នបង្កើតពាន Ballon d’Or បាននិយាយថាមហិច្ឆតាតែមួយគត់របស់ Cristiano Ronaldo គឺចង់ឈ្នះ Ballon d’Or ឱ្យបានច្រើនជាង Lionel Messi មុនចូលនិវត្តន៍។ ការលើកឡើងនេះត្រូវបាន Cristiano Ronaldo ចេញមុខបដិសេធយ៉ាងខ្លាំងក្លា ដោយថាវាជារឿងមិនពិត មិនអាចទទួលយកបានឡើយ។
![](https://asset.ams.com.kh/sports/media/pascal-1024x637.jpg)
Ronaldo សង្កត់ធ្ងន់ថាគេតែងអបអរអ្នកឈ្នះពាន Ballon d’Or មិថាជានរណាទេ ហើយគេចង់ឈ្នះពាននេះក៏មិនមែនដើម្បីប្រជែងនឹងនរណាឡើយ ប៉ុន្តែគឺដើម្បីខ្លួនឯង ដើម្បីក្លិបដែលគេលេងឱ្យ និងដើម្បីមនុស្សដែលស្រលាញ់រូបគេ។
![](https://asset.ams.com.kh/sports/media/ronaldo3-1024x781.jpg)
កំពូលខ្សែប្រយុទ្ធព័រទុយហ្គាល់វ័យ៣៦ឆ្នាំមកទល់ពេលនេះបានឈ្នះពាន Ballon d’Or ៥លើក ខណៈ Messi បានឈ្នះលើកទី៧កាលពីយប់ថ្ងៃចន្ទទី២៩ខែវិច្ឆិកាឆ្នាំ២០២១។ ក្នុងពាន Ballon d’Or 2021 នេះ Ronaldo ទទួលបានចំណាត់ថ្នាក់ទី៦ ដ្បិតបានពិន្ទុតិចជាង Messi, Robert Lewandowski, Jorginho, Karim Benzema និង N’Golo Kante តាមលំដាប់។ Ronaldo ពុំមានវត្តមាននៅក្នុងពិធីប្រគល់ពានរង្វាន់នៅប៉ារីសឡើយយប់មិញ។
និពន្ធនាយក France Football លោក Ferre បាននិយាយប្រាប់សារព័ត៌មាន New York Times ថា៖ «Ronaldo មានមហិច្ឆតាតែ១គត់ ហើយនោះគឺការចូលនិវត្តន៍ដោយមានពាន Ballon d’Or ច្រើនជាង Messi….ហើយខ្ញុំដឹងរឿងនេះដោយសារគាត់បានប្រាប់ខ្ញុំ»។
ប៉ុន្តែតារាក្លិប Manchester United : Ronaldo បានបង្ហោះសេចក្ដីថ្លែងការណ៍ច្បាស់ៗលើគណនី Instagram តបចំៗសំដៅលោក Pascal Ferre។
![](https://asset.ams.com.kh/sports/media/cr7statement-1024x767.jpg)
សេចក្ដីប្រកាសរបស់ CR7 មានអត្ថន័យថា៖ «លទ្ធផលថ្ងៃនេះពន្យល់អំពីមូលហេតុដែល Pascal Ferre និយាយសប្ដាហ៍មុន ដែលគាត់បានអះអាងថាខ្ញុំបានប្រាប់រឿងសម្ងាត់ដល់គាត់ថាមហិច្ឆតាតែ១គត់របស់ខ្ញុំគឺការបញ្ចប់អាជីពដោយឈ្នះពានបាល់មាសច្រើនជាង Lionel Messi។ Pascal Ferre បាននិយាយកុហក។ គាត់បានប្រើឈ្មោះរបស់ខ្ញុំដើម្បីផ្សព្វផ្សាយអំពីខ្លួនឯងនិងដើម្បីផ្សព្វផ្សាយកន្លែងដែលគាត់ធ្វើការឱ្យ។ វាមិនអាចទទួលយកបានឡើយដែលមនុស្សម្នាក់ដែលមានភារៈផ្ដល់ពានរង្វាន់ដ៏មានកិត្យានុភាពបែបនេះអាចនិយាយកុហករបៀបនេះទៅបាន ដោយគ្មានការគោរពទាល់តែសោះចំពោះមនុស្សម្នាក់ដែលតែងតែគោរពអង្គភាព France Football និងពាន Ballon d’Or។ ហើយនៅថ្ងៃនេះ គាត់បាននិយាយកុហកម្ដងទៀតហើយ ដោយអះអាងថាអវត្តមានរបស់ខ្ញុំពីកម្មវិធីគឺដោយសារខ្ញុំជាប់ធ្វើចត្តាឡីស័ក ដែលជាសម្ដីគ្មានហេតុផលទាល់តែសោះ។ ខ្ញុំតែងតែចង់អបអរសាទរក្នុងស្មារតីអ្នកកីឡានិងគោលការណ៍ fair-play ដែលខ្ញុំតែងតែប្រកាន់ខ្ជាប់តាំងពីដើមទីមក ចំពោះអ្នកដែលឈ្នះពាន ហើយខ្ញុំធ្វើបែបនេះព្រោះខ្ញុំមិនដែលប្រឆាំងនឹងនរណាម្នាក់ឡើយ។ ខ្ញុំតែងតែចង់ឈ្នះដើម្បីខ្លួនឯងនិងដើម្បីក្លិបដែលខ្ញុំលេងឱ្យ។ ខ្ញុំចង់ឈ្នះដើម្បីខ្លួនឯងនិងមនុស្សដែលស្រឡាញ់ខ្ញុំ។ ខ្ញុំមិនមែនចង់ឈ្នះដើម្បីប្រឆាំងនឹងនរណាម្នាក់ទេ។ មហិច្ឆតាធំបំផុតក្នុងអាជីពរបស់ខ្ញុំគឺចង់ឈ្នះពានជាតិនិងអន្តរជាតិទាំងឡាយសម្រាប់ក្លិបដែលខ្ញុំលេងឱ្យនិងសម្រាប់ក្រុមជម្រើសជាតិក្នុងប្រទេសរបស់ខ្ញុំ។ មហិច្ឆតាធំបំផុតក្នុងអាជីពរបស់ខ្ញុំគឺធ្វើជាគំរូល្អមួយសម្រាប់អ្នកទាំងអស់ដែលជានិងចង់ក្លាយជាកីឡាករបាល់ទាត់អាជីព។ មហិច្ឆតាធំបំផុតក្នុងអាជីពរបស់ខ្ញុំគឺធ្វើឱ្យឈ្មោះរបស់ខ្ញុំត្រូវបានចារក្នុងក្រាំងមាសក្នុងប្រវត្តិសាស្ត្របាល់ទាត់ពិភពលោក»។
«ខ្ញុំនឹងបញ្ចប់សេចក្ដីដោយការនិយាយថាការផ្ដោតរបស់ខ្ញុំគឺមានរួចទៅហើយសម្រាប់ការប្រកួតបន្ទាប់របស់ Manchester United និងលើគ្រប់យ៉ាងដែលពួកយើងនៅតែអាចសម្រេចបានក្នុងរដូវកាលនេះជាមួយគ្នាជាមួយមិត្តរួមក្រុមនិងអ្នកគាំទ្រ។ ចុះរឿងផ្សេងទៀត? រឿងផ្សេងទៀតគឺគ្រាន់តែជារឿងផ្សេងទៀត…»៕
![](https://asset.ams.com.kh/sports/media/RONALDO-1024x683.jpg)