ខ្សែបម្រើប្រយុទ្ធ Jack Grealish បានទម្លាយរឿងសម្ងាត់មួយក្នុងសម្ភាសន៍ជាមួយសារព័ត៌មាន Telegraph ដោយនិយាយថាគេកៀកនឹងចូលរួម Manchester United ទៅហើយក្នុងរដូវក្ដៅឆ្នាំ២០២០ ប៉ុន្តែទីបំផុតបែរជាគ្មានអ្វីកើតឡើង។
Grealish អាចវិលទៅប្រកួតទល់នឹងក្រុមចាស់របស់គេជាលើកដំបូងនៅរាត្រីថ្ងៃពុធទី១ខែធ្នូឆ្នាំ២០២១នេះ នៅពេល Manchester City ទៅសួរសុខទុក្ខ Aston Villa ម៉ោង៣៖១៥យប់ ម៉ោងកម្ពុជា។
កីឡាករជម្រើសជាតិអង់គ្លេសវ័យ២៦ឆ្នាំ បានចេញពី Aston Villa ទៅចូលរួម Man City ក្នុងរដូវក្ដៅ២០២១នេះក្នុងតម្លៃផ្ដាច់កុងត្រា១០០លានផោន។ Grealish ដុះដាលចេញពីថ្នាល Aston Villa ផ្ទាល់ និងបានរួមរស់ជាមួយក្លិបនេះតាំងពី២០០១រហូតដល់២០២១។
គេបានរងរបួសតាំងពីពេលក្រុមជម្រើសជាតិប្រមូលផ្ដុំលើកចុងក្រោយបង្អស់នេះ ប៉ុន្តែគេបានត្រលប់មកហ្វឹកហាត់ឡើងវិញហើយ ហើយអ្នកចាត់ការ Man City លោក Pep Guardiola បង្ហើបតម្រុយថា Grealish អាចបង្ហាញវត្តមាននៅកីឡដ្ឋាន Villa Park ដែល Grealish រំពឹងថានឹងទទួលបានការស្វាគមន៍ល្អមួយពីក្លិបចាស់របស់គេ។
Grealish និយាយថាគេអ្នកមកពីតំបន់ Solihull ដែលស្រលាញ់ក្លិប Aston Villa។ ទោះបីគេផ្ទេរចេញពីក្លិបនេះទៅហើយក្ដី តែគេនៅតែជា Jack Grealish ដដែល និងនៅស្រលាញ់ក្លិបនេះពេញមួយជីវិត។ យប់នេះ បើគេបានចូលលេង ហើយស៊ុតចូល Aston Villa គេនឹងមិនអបអរគ្រាប់បាល់ឡើយ។
ដោយឡែក ទាក់ទងនឹង Manchester United, Grealish បានទម្លាយថាគេពិតជាប៊ិះចូលរួម ក្លិបនេះទៅហើយក្នុងរដូវក្ដៅ២០២០។ គេបាននិយាយថាកាលណោះ គេលេង pre-season ទល់នឹង Man Utd នៅថ្ងៃសៅរ៍ ហើយនៅក្រោយការប្រកួតនោះ គេបានប្រាប់លោក Purslow ប្រធានប្រតិបត្តិ Aston Villa និងភ្នាក់ងាររបស់គេ David Manasseh ថាបើគេមិនបានចេញក្នុងរដូវក្ដៅនោះទេ គេនឹងស៊ីញេកិច្ចសន្យាថ្មី។ ទីបំផុត គ្មានអ្វីកើតឡើងជាមួយ Man Utd ហើយនៅថ្ងៃអង្គារសប្ដាហ៍បន្ទាប់ គេបានស៊ីញេកិច្ចសន្យាថ្មីជាមួយ Villa ដោយបញ្ចូលតម្លៃបង់ផ្ដាច់១០០លានផោន ដែលជាលក្ខខណ្ឌឈ្នះ-ឈ្នះ ព្រោះបើមានក្លិបណាហ៊ានចំណាយ Villa នឹងបានចំណូល១០០លានផោន ហើយក៏មានន័យថាគេលេងបានល្អខ្លាំងដែរ ទើបមានក្លិបហ៊ានបង់១០០លានផោនដើម្បីនាំយករូបគេចេញពី Villa។
បន្ថែមលើនេះ Grealish និយាយថាគេសង្ឃឹមថានៅថ្ងៃណាមួយគេអាចត្រលប់ទៅ Villa វិញ ក្នុងរបៀបស្រដៀងនឹងអ្វីដែល Ashley Young បានធ្វើ៕
ប្រភព៖ Telegraph
