អតីតកីឡាករគុនចម្រុះលំដាប់ពិភពលោក Conor McGregor បានប៉ាន់ប្រមាណថាលោកនឹងក្លាយជាមហាសេដ្ឋី មានទ្រព្យចាប់ពី១ពាន់លាននៅ៣ឆ្នាំខាងមុខ។ បុរសវ័យ៣២ឆ្នាំរូបនេះ បច្ចុប្បន្នមានទ្រព្យសម្បត្តិប្រមាណ ១០០លានផោន ដែលចំណូលទាំងនោះ បានមកពីការប្រកួត ព្រមទាំងការផ្សាយឱ្យម៉ាកផលិតផលល្បីៗជាច្រើនដូចជា Burger King, Beats by Dre, Monster Energy និង Reebok ជាដើម ប៉ុន្ដែចំណូលបានពីក្រុមហ៊ុន Proper 12 Irish Whiskey របស់លោក អាចទទួលបានប្រមាណ ៧៥០ផោនក្នុងមួយឆ្នាំ។
![](https://asset.ams.com.kh/sports/media/NINTCHDBPICT000555328514-e1604075263384-2.jpg)
អតីតម្ចាស់ខ្សែក្រវាត់ប្រភេទទម្ងន់ lightweight និង featherweight រូបនេះគឺជាកីឡាករដែលចំណូលបានច្រើនបំផុត នៅក្នុងប្រវត្តិសាស្ដ្រ UFC ហើយកាលប្រកួតប្រដាល់ជាមួយ Floyd Mayweather កាលពីឆ្នាំ ២០១៧ លោកទទួលបាន ៨០លានផោន។
នៅក្នុងកម្មវិធីសំណួរចម្លើយជាមួយអ្នកគាំទ្រដែលបានសួរនៅលើគណនី Twitter ថាតើ ពេលណាទើបលោករំពឹងថាអាចក្លាយជាមហាសេដ្ឋី អ្នកប្រដាល់សញ្ជាតិអៀរឡង់រូបនេះ បានឆ្លើយតបថា៖ «នៅអាយុ៣៥ឆ្នាំ»។
ប្រសិនបើដូចសម្ដីរបស់ McGregor មែនមានន័យថា លោកអាចនឹងក្លាយជាអត្តពលិកទី៦នៅក្នុងប្រវត្តិសាស្ដ្រ ដែលមានទ្រព្យ១ប៊ីលាន(១០០០លាន)។ ខ្សែប្រយុទ្ធ Lionel Messi ជាកីឡាករចុងក្រោយបង្អស់ដែលត្រូវបានរាប់បញ្ចូលក្នុងបញ្ជូលក្នុងបញ្ជីអត្តពលិក ដែលមានទ្រព្យចាប់ពី ១ប៊ីលានឡើងទៅ បន្ទាប់ពី Cristiano Ronaldo, Tiger Woods, Michael Jordan និង Floyd Mayweather។
ទោះយ៉ាងណាក្ដី McGregor អាចនឹងត្រូវបាននាំមុខដោយអតីតកីឡាករវាយតេនីស Roger Federer ដែលបច្ចុប្បន្នមានទ្រព្យប្រមាណ ៩០០លានដុល្លារ៕