អតីតតារាជើងស៊ុតរបស់ក្រុមកាំភ្លើងធំ Arsenal លោក THIERRY HENRY ត្រូវបានបោះឆ្នោតជាប់ជាកីឡាករល្អជាងគេក្នុងប្រវត្តិសាស្ត្រ Premier League។ នេះបើយោងតាម Football Fans។
![](https://asset.ams.com.kh/sports/media/Henry-Arsenal-2006-07-1024x661.jpg)
វីរៈបុរស Arsenal ខាងលើទទួលបានសំឡេងឆ្នោតលើស ១៥ភាគរយ ហើយបានយកឈ្នះទៅលើ Criatiano Ronaldo និង Alan Shearer តាមការស្ទង់មតិអ្នកគាំទ្រជាង ១០០០នាក់ ក្នុងវេបសាយ Betfair សហការជាមួយ YouGOV ក្នុងខួប៣០ឆ្នាំនៃការបង្កើតក្របខណ្ឌ Premier League។
![](https://asset.ams.com.kh/sports/media/photo_2022-08-12_15-05-19-1024x576.jpg)
អតីតខ្សែប្រយុទ្ធឆ្នើមរបស់ក្រុមកាំភ្លើងធំ រូបនេះ រកបាន ១៧៥គ្រាប់ យ៉ាងអស្ចារ្យក្នុង Premier League ដោយក្នុងនោះ ១៧៤ គ្រាប់រកបាន ចន្លោះពីឆ្នាំ ១៩៩៩ ដល់ ឆ្នាំ ២០០៧ មុនពេលចាកចេញទៅ Barcelona។ ក្នុងរដូវកាល ២០១១ -២០១២ លោកបានវិលមកក្នុងក្រុមលោក Arsene Wenger ជាថ្មីក្រោមកិច្ចសន្យាខ្ចី ហើយបានបង្ហាញខ្លូនសារជាថ្មីសម្រាប់ Arsenal និងស៊ុតបាល់បញ្ចូលទីបាន១គ្រាប់។
លោកថែមទាំងបានបញ្ជូនបាល់ឱ្យមិត្តរួមក្រុមស៊ុតបញ្ចូលទី ៧៤ដង ក្នុងការបង្ហាញខ្លួនសរុប២៥៨ប្រកួតក្នុងក្របខណ្ឌកំពូលរបស់អង់គ្លេស។
អតីតកីឡាករជម្រើសជាតិបារាំង ធ្លាប់ទទួលបានស្បែកជើងមាស ៤ ដង និងពានកីឡាករល្អប្រចាំខែ ៤ដង ក្នុងក្របខណ្ឌ Premier League។ លើសពីនេះរូបគេក៏បានជាប់ជាកីឡាករល្អប្រចាំរដូវកាល២ឆ្នាំជាប់ៗគ្នាផងដែរក្នុងក្របក្របខណ្ឌ Premier League។
![](https://asset.ams.com.kh/sports/media/2817344-58111908-2560-1440-1024x576.jpg)
គួររំលឹកផងដែរថា លោក Henry បានឈ្នះជើងឯក Premier League ២ ដង ជាមួយក្រុមកាំភ្លើងធំ Arsenal ពិសេសរដូវកាល ២០០៣-២០០៤ ដែលជារជ្ជកាលមាសរបស់ពួកគេ។
គួរជម្រាបផងដែរថា ក្នុងការបោះឆ្នោតខាងលើនោះ ម្ចាស់ពាន Ballon d’Or ៥សម័យកាល Ronaldo ស្ថិតក្នុងលំដាប់ទី២ និងតាមពីក្រោយម្ចាស់កំណត់ត្រាគ្រាប់បាល់ច្រើនជាងគេប្រចាំក្របខណ្ឌ Premier League គឺលោក Alan Shearer ស្ថិតក្នុងលំដាប់ទី៣៕