Manchester United ត្រូវបានរាយការណ៍ថាខិតជិតដល់ការចុះកុងត្រាយកកីឡាចំណូលថ្មីទី04មកចូលរួមក្នុងរដូវក្តៅនេះ ដោយខ្សែប្រយុទ្ធ Matheus Cunha ត្រូវបានគេរំពឹងថានឹងអាចផ្លាស់មកចូលរួមនៅ Old Trafford នាពេលឆាប់ៗខាងមុខនេះ។
ក្លិបបិសាចក្រហម កំពុងព្យាយាមស្វែងរកកីឡាករចំណូលថ្មីបន្ថែមទៀតដើម្បីមកជួយក្រុមឲ្យមានភាពល្អប្រសើរឡើងវិញបន្ទាប់ពីចាប់ផ្តើមរដូវកាលថ្មី Premier League 2022-23 យ៉ាងអាម៉ាស់បំផុតដោយឆ្លងកាត់2ប្រកួតកន្លងមកមាន០ពិន្ទុស្ថិតនៅបាតតារាងនៃក្លិបទាំង២០ដែលចូលរួមប្រកួតប្រជែង។ភាពអាម៉ាស់ចាញ់ក្រោមថ្វីជើងក្លិប Brentford 4-0 កាលពីថ្ងៃសៅរ៍ ទី១៦ ខែសីហា កន្លងទៅធ្វើឲ្យមជ្ឈដ្ឋានខាងក្រៅអះអាងថា Erik Ten Hag គួរតែដើរចេញពីក្លិបដែលលោកបានចូលរួមកាលពីខែឧសភា ឆ្នាំ២០២២ នេះទៅ។
Man United ត្រូវបានគេរំពឹងថានឹងនាំចូលកីឡាករថ្មីបន្ថែមទៀត ហើយសូម្បីតែកីឡាករនៅក្នុងក្រុមជាក់ស្តែងក៏ទទូចឲ្យក្លិបមួយនេះប្រញាប់ចុះកុងត្រានាំយកកីឡាករចំណូលថ្មីបន្ថែមដើម្បីស្តារស្ថានភាពក្រុមឡើងវិញ។
ខណៈតំណែងបម្រើនៅតែជាអាទិភាពសម្រាប់លោក Ten Hag ហើយកីឡាករ Frenkie de Jong នៅតែជាមុខព្រួញដែលលោកចង់នាំយកមកចូលរួមក្លិប។
មិនតែប៉ុណ្ណោះខ្សែប្រយុទ្ធក៏ស្ថិតក្នុងបញ្ចីកីឡាករដែលលោកត្រូវនាំចូលឲបានផងដែរមុនទីផ្សារដោះដូរកីឡាករត្រូវបានបិទនៅថ្ងៃទី១ ខែកញ្ញា ឆ្នាំ២០២២។
យោងតាម talkSPORT បានបញ្ជាក់ថា៖ ក្លិបមកពី Premier League មួយនេះជិតឈានដល់កិច្ចព្រមព្រៀងនាំយកខ្សែប្រយុទ្ធវ័យ២៣ឆ្នាំ Cunha ពីក្លិប Atletico Madrid ជាមួយតម្លៃខ្លួនប្រមាណ 50 លានអឺរ៉ូ។
កីឡាករសញ្ជាតិប្រេស៊ីលបានផ្លាស់មកចូលរួមក្លិបយក្សអេស្ប៉ាញ At Madrid ពី Hertha Berlin ក្នុងតម្លៃខ្លួន 24 លានអឺរ៉ូកាលពីរដូវកាល 2020-21 ដែលនេះមានន័យថាវាជាការចំណេញប្រាក់ដ៏ច្រើនក្នុងរយៈពេលត្រឹមមួយឆ្នាំសម្រាប់ក្លិបយក្សអេស្ប៉ាញមួយនេះ ដោយម្ចាស់មេដាយមាស អូឡាំពិក២០២០ ក៏មិនមានគ្រាប់បាល់ច្រើនគ្រាប់នោះឡើយ សម្រាប់រដូវកាលដំបូងរបស់ខ្លួននៅ At Madrid។
Cunha រកគ្រាប់បាល់បានត្រឹមតែ 6 គ្រាប់ប៉ុណ្ណោះក្នុងការបង្ហាញខ្លួន 29 ប្រកួតនៅ La Liga និងបានបញ្ជូនបាល់ឲមិត្តរួមក្រុមចំនួន 6គ្រាប់ ដែលនេះមិនមែនជាជម្រើសដ៏ល្អឡើយសម្រាប់បិសាចក្រហម ខណៈដែល២ប្រកួតកន្លងមកក្រុមនេះរកបានតែមួយគ្រាប់គត់ហើយគ្រាប់បាល់នោះជាបាល់ Own Goal ដែលរកបានពីកីឡាករ Alexis Mac Allister របស់ Brighton។
Man Utd នៅតែបន្តរក្សា Cristiano Ronaldo ឲ្យស្នាក់នៅក្លិបជាបន្ត ទោះបីជាមានព័ត៌មានទាក់ទងនឹងការចង់ចាកចេញរបស់គាត់ក៏ដោយ យ៉ាងណាមិញ Man Utd នឹងព្យាយាមស្វែងរកខ្សែប្រយុទ្ធថ្មីបន្ថែមទៀតដើម្បីពង្រឹងតំបន់ប្រយុទ្ធរបស់ខ្លួនឲមានភាពមុតស្រួច។ Cunha ជាប្រភេទកីឡាករដែលលេងបានច្រើនតំណែងក្នុងតំបន់ប្រយុទ្ធ មិនថាលេងជាខ្សែប្រយុទ្ធទោល ,មានដៃគូ ឬ ខ្សែប្រយុទ្ធស្លាប។ក្នុងខណៈដែល talkSPORT បានចុះផ្សាយថាកៀកនឹងចុះកុងត្រាបាន អ្នកសារ ព័ត៌មានដ៏ល្បីសញ្ជាតិអុីតាលី Fabrizio Romano បាននិយាយថា កីឡាករនិងក្លិបបានពិភាក្សាគ្នាមែន ប៉ុន្តែមិនទាន់មានកិច្ចព្រមព្រៀងណាមួយសម្រេចជាផ្លូវការនៅឡើយ។
កាលពីពេលថ្មីៗកន្លងទៅក៏មានព័ត៌មានទាក់ទងទៅនឹងការចង់បានមិត្តរួមក្រុម Cunha ពី At Madrid គឺកីឡាករ Alvaro Morata ហើយកាលពីរាត្រីថ្ងៃច័ន្ទ ទី១៥ ខែសីហា កន្លងទៅខ្សែប្រយុទ្ធ Morata បានស៊ុតបញ្ចូលទី២គ្រាប់ជួយឲក្រុមរបស់លោក Diego Simeone ទទួលបានជ័យជំនះក្នុងប្រកួតបើកឆាករដូវកាលថ្មី La Liga 2022-23 លើ Getafe 3-0 ផងដែរ។
Manchester United ក៏ធ្លាប់បានដាក់សំណើរដេញថ្លៃទិញកីឡាករ Marko Arnautovic ប៉ុន្តែត្រូវបានដកសំណើរនេះទៅវិញដោយសារតែមានការមិនពេញចិត្តពីអ្នកគាំទ្រ។ដូចនេះខ្សែប្រយុទ្ធ Cunha អាចនឹងជាជម្រើសចុងក្រោយសម្រាប់ក្លិប Man Utd មុននឹងទីផ្សារដោះដូរកីឡាករបិទនៅថ្ងៃទី០១ ខែកញ្ញាខាងមុខដនេះ។
