លោកព្រឹទ្ធាចារ្យក្រមាមាស សាន គឹមស៊ាន បានអំពាវនាវឲ្យបន្តអភិរក្ស និងអភិវឌ្ឍគុនល្បុក្កតោខ្មែរដើម្បីភាពឋិតឋេរគង់វង្ស។ តែជាមួយគ្នានេះ មិនត្រូវកែប្រែក្បាច់គុនមរតកជាតិនេះទេ។ មិនត្រូវកែប្រែដោយសារតែនេះជាក្បាច់គុនតាំងពីដូនតា ហើយមានរាប់ម៉ឺនក្បាច់ ហើយមកទល់ពេលនេះលោកបានចងក្រងជាង៤ពាន់ក្បាច់ហើយ។
លោកព្រឹទ្ធាចារ្យក្រមាមាសដែលបានចំណាយពេលស្ទើរពេញមួយជីវិតចងក្រងគុនល្បុក្កតោខ្មែរថ្លែងបែបនេះនៅព្រឹកថ្ងៃព្រហស្បតិ៍ ទី០១ ខែធ្នូ នាស្នាក់ការគណៈកម្មាធិការជាតិអូឡាំពិកកម្ពុជា ក្នុងពិធីអបអរដល់ការចុះបញ្ជីល្បុក្កតោខ្មែរជាបេតិកភណ្ឌអរូបិយរបស់មនុស្សជាតិ នៃអង្គការយូណេស្កូ។
