Donny van de Beek ខ្សែបម្រើក្លិប Manchester United បានចាកចេញពីទីលានប្រកួតទាំងទឹកភ្នែក បន្ទាប់ពីទទួលរងរបួសជង្គង់ខាងស្ដាំ ការប្រកួតក្នុងក្របខណ្ឌ Premier Leagueជាមួយក្លិប Bournemouth កាលពីយប់ថ្ងៃអង្គារទី៣ ខែមករាឆ្នាំ ២០២៣ នៅទឹកដី old Trafford ។
![](https://asset.ams.com.kh/sports/media/photo_2023-01-04_15-36-42.jpg)
ខ្សែបម្រើវ័យក្មេង សញ្ជាតិហូឡង់រូបគេ ទើបតែបានបង្ហាញខ្លួនជាប់ជម្រើសដំបូងក្នុងក្របខណ្ឌ Premier League នារដូវកាលនេះឲ្យManchester United បានតែពីរលើកប៉ុណ្ណោះ Van de Beek ត្រូវបានបង្ខំចិត្តផ្លាស់ប្តូរចេញនៅចុងបញ្ចប់នៃតង់ទី១ បន្ទាប់ពី Marcos Senesi បានរអិលជើងរទៅប៉ះទង្គិចជាមួយជើងខាងស្ដាំ ផ្នែកជង្គង់របស់Donny van de Beek។
![](https://asset.ams.com.kh/sports/media/photo_2023-01-04_15-36-39.jpg)
អតីតកីឡារករ Ajax វ័យ ២៥ ឆ្នាំរូបនេះ បានស្រែកយំដោយភាពសោកសៅ ខណៈមិត្តរួមក្រុម និង កីឡាករBournemouth ក៏បានបង្ហាញអារម្មណ៍ភ្ញាក់ផ្អើលចំពោះស្ថានភាពធ្ងន់ធ្ងររបួសរបស់Donnyផងដែរ។
សម្រាប់ស្ថានភាពរបស់ Van de Beek បច្ចុប្បន្នអ្នកចាត់ការ Manchester United លោក Erik ten Hag បានចេញមកបញ្ជាក់ផងដែលថា “យើងត្រូវរង់ចាំមើលការពិនិត្យ និង តាមដានដោយគ្រូពេទ្យក្នុងរយៈពេល ២៤ ម៉ោងសិន”
![](https://asset.ams.com.kh/sports/media/IMG_3175.jpg)
គួរបញ្ជាក់ផងដែរថា Van de Beek ត្រូវបានក្លិប Manchester United ចុះហត្ថលេខានាំយករូបគេ ពីក្លិប Ajax របស់ប្រទេសហូឡង់ ក្នុងតម្លៃខ្លួន ៤០ លានផោន តែសម្រាប់រដូវកាលនេះវិញ Donny បង្ហាញខ្លួនឲ្យក្លិបបានតែ ១៦២នាទី ប៉ុណ្ណោះ សម្រាប់របួសជង្គង់រូបគេហាក់ដូចត្រូវចំណាយពេលយូរក្នុងការព្យាបាល និង ដើម្បីពេញលេញក្នុងការត្រលប់មកកាន់ទីលានវិញ។
![](https://asset.ams.com.kh/sports/media/0_Soccer-Premier-League-Manchester-United-Kingdom-03-Jan-2023.jpg)
ចំពោះលទ្ធផលនៃការប្រកួតក្រុមវិញ Manchester United បានយកឈ្នះក្រុម Bournemouth ក្នុងលទ្ធផល ៣ទល់នឹង០ ដែល៣គ្រាប់របស់ក្រុមបិសាចក្រហម រកបានដោយ Casemiro នៅក្នុងនាទីទី២៣ និងចូលមកដល់វគ្គទី២ Luke Shaw បានបន្ថែមការនាំមុខ១ គ្រាប់ទៀត ក្នុងនាទីទី៤៩ មុននឹងបញ្ចប់វគ្គទី២ ទៅហើយ Marcus Rashford បានរកគ្រាប់ទី៣ ឲ្យ Manchester United នៅនាទីទី៨៦ ដោយទទួលបាល់យ៉ាងល្អពី Bruno Fernandes។
![](https://asset.ams.com.kh/sports/media/IMG_3180-1024x538.jpg)
សម្រាប់តារាងចំណាត់ថ្នាក់ក្រុមManchester United ក្នុងក្របខណ្ឌPremier League បច្ចុប្បន្នវិញ កំពុងស្ថិតនៅចំណាត់ថ្នាក់លេខ៤ មាន៣៥ ពិន្ទុ តាមពីក្រោយ ក្រុម Newcastle United លេខ៣ មាន៣៥ ពិន្ទុដូចគ្នា តែបិសាចក្រហមកំពុងមាន ១ប្រកួតនៅក្នុងដៃ ខណៈក្រុមManchester City ស្ថិតនៅចំណាត់ថ្នាក់លេខ២ មាន៣៦ ពិន្ទុ ដោយមាន២ ប្រកួតនៅក្នុងដៃ ចំណែក Arsenal កំពុងកាន់កាប់កំពូលតារាង មាន៤៤ ពិន្ទុ បន្ទាប់ពីឆ្លងកាត់ការប្រកួតអស់១៧សប្ដាហ៌៕