សហព័ន្ធកីឡាបាល់ទាត់អេហ្ស៊ីប ប្រកាសថាខ្សែបម្រើ Mohamed Elneny របស់ Arsenal បានធ្វើតេស្តវិជ្ជមានកូវីដ១៩។
កីឡាករវ័យ២៨ឆ្នាំរូបនេះគ្មានរោគសញ្ញាអ្វីឡើយ ប៉ុន្តែត្រូវបានតេស្តវិជ្ជមានពេលទៅដល់ប្រទេសតូហ្គោ ដើម្បីប្រកួតជម្រុះពានទ្វីបអាហ្វ្រិកសម្រាប់អេហ្ស៊ីបនៅថ្ងៃអង្គារនេះ។
អេហ្ស៊ីប អះអាងថា Elneny បានធ្វើតេស្តអវិជ្ជមាន៣ដងតាំងពីទៅចូលរួមជំរំជម្រើសជាតិ រួមទាំងនៅក្រោយការប្រកួតឈ្នះ១-០លើតូហ្គោក្នុងទឹកដីកាលពីថ្ងៃសៅរ៍ផងដែរ ដែលគេបានលេងពេញ៩០នាទី។
កាលពីថ្ងៃចន្ទទី១៦ខែវិច្ឆិកាម្សិលមិញនេះ Premier League បានប្រកាសថាមានលទ្ធផលវិជ្ជមាន១៦នាក់ក្នុងការធ្វើតេស្តលើកីឡាករនិងបុគ្គលិកក្លិបចំនួន១២០៧នាក់រវាងថ្ងៃទី៩ដល់១៥ខែវិច្ឆិកានេះ។ អ្នកដែលតេស្តវិជ្ជមាននឹងត្រូវនៅដោយឡែករយៈពេល១០ថ្ងៃ៕
