អ្នកស្រី គូ សុភ័ក្ដ ម្ដាយកីឡាការិនី អូន ស្រីដា ម្ចាស់មេដាយសំរឹទ្ធការ៉ាតេ វិញ្ញាសាសម្ដែងជាក្រុម ក្នុងព្រឹត្តិការណ៍កីឡាអាស៊ី ឆ្នាំ២០២៣ រំឭកប្រាប់ថា កូនស្រីរបស់អ្នកស្រីបានចូលហ្វឹកហាត់កីឡាមួយប្រភេទនេះដំបូងក្នុងឆ្នាំ២០១៨។ កាលណោះអ្នកស្រីមិនបានផ្ចុងផ្ដើម ឬជំរុញឡើយ ដោយនាងបានទៅហាត់តាមមិត្តភក្ដិ នៅសាលារៀនមួយកន្លែងក្បែរផ្ទះ។
យ៉ាងណា ស្ត្រីមានលំនៅនៅភូមិសាឡុង ឃុំឈូក ស្រុកវិហាសួគ៌ ខេត្តកណ្ដាល អះអាងថា មិនបានហាមឃាត់កូនស្រីឡើយ ព្រោះនាងស្រលាញ់កីឡានេះទៅហើយ គឺមានតែលើកទឹកចិត្តរហូតមក ដែលធ្វើឱ្យនាងទទួលបានលទ្ធផលជាហូរហែ និងអាចក្លាយជាជម្រើសជាតិ។
កីឡាការិនី អូន ស្រីដា ជាសមាជិកមួយរូបក្នុងក្រុមដែលមានគ្នា២រូបទៀត គឺ ថាត់ ឆេងហ័ង និង ពុទ្ធា ស្រីណុច ដែលបានឈ្នះមេដាយសំរឹទ្ធកីឡាអាស៊ី ប្រភេទកីឡាការ៉ាតេវិញ្ញាសាសម្ដែងជាក្រុម។ នេះក៏ជាសមិទ្ធផលជាបន្តបន្ទាប់របស់ស្រីដា ទាំងថ្នាក់ជាតិ និងអន្តរជាតិ៕
