សហព័ន្ធកីឡាឡើងភ្នំកម្ពុជាបានធ្វើពិធីបិទវគ្គបណ្តុះបណ្តាលបច្ចេកទេសកីឡាឡើងភ្នំកម្រិតបឋម និងគ្រូបង្វឹកកម្រិត១-២ (ឆ្នាំ២០២៤) ដោយជោគជ័យដែលមានការអញ្ជើញចូលរួមក្រោមអធិបតីភាពឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និង ជាអនុប្រធានសហភាពសហព័ន្ធយុវជនកម្ពុជា នៅរសៀលថ្ងៃទី១៣ ខែមិថុនា ឆ្នាំ២០២៤ នាអគារខេមរានី ទីស្នាក់ការសហភាពសហព័ន្ធយុវជនកម្ពុជារាជធានីភ្នំពេញ។ វគ្គបណ្តុះបណ្តាលនេះមានសិក្ខាកាមចូលរួមសរុបចំនួន៧៤នាក់មកពីបណ្តាក្លឹប សមាគម មហាជនទូទាំង២៥រាជធានី-ខេត្ត។
ថ្លែងក្នុងពិធីបិទ ឯកឧត្តមឧបនាយរដ្ឋមន្រ្តី សាយ សំអាល់ មានប្រសាសន៍ថា “កីឡាគឺជាបំណែកមួយនៃគ្រឹះគុណភាពជីវិតថ្មីរបស់ប្រជាជនកម្ពុជា ស្របទៅតាមបំណងប្រែក្លាយកម្ពុជាទៅជារដ្ឋទំនើបដែលមានយុទ្ធសាស្ត្របញ្ចកោណដំណាក់កាលទី១ វិធានការគន្លឹះទាំង៥ និង គោលនយោបាយទាំង៦ របស់សម្ដេចធិបតី ហ៊ុន ម៉ាណែត នាយករដ្ឋន្រ្តីនៃព្រះរាជាណាចក្រកម្ពុជា ជាផែនទីឯកភាពក្នុងការអនុវត្តចក្ខុវិស័យវែងឆ្ងាយរបស់កម្ពុជា។ ក្នុងនោះការកសាងធនធានមនុស្សជាអទិភាពគន្លឹះទី១ នៃអាទិភាពគន្លឹះទាំង៥ គឺ មនុស្ស ផ្លូវ ទឹក ភ្លើង និង បច្ចេកវិទ្យា។ មនុស្សក្នុងរដ្ឋទំនើបកម្ពុជាគឺ លេងកីឡាមួយមុខយ៉ាងតិចប្រចាំជីវិត មានសុខភាពល្អ រាងកាយមាំមួន មានចំណេញដឹងជ្រៅជ្រះ ជំនាញរឹង ជំនាញទន់ សីលធម៌ សុជីវធម៌ ប្រាជ្ញាវាងវៃជាពលរដ្ឋសកល ទឹកចិត្តស្នេហាជាតិ។
កីឡាឡើងភ្នំនេះ គឺជាផ្នែកមួយនៃការលើកកម្ពស់វិស័យកីឡា សហភាពសហព័ន្ធយុវជនកម្ពុជា បាននិងកំពុងចូលរួមចំណែកអភិវឌ្ឍវិស័យកីឡានៅតាមគ្រឹះស្ថានមធ្យមសិក្សារដ្ឋ និង ឯកជននៅរាជាធានីភ្នំពេញ ឱ្យមានសកម្មភាពរស់រវើក ហើយការផ្ដួចផ្ដើមនេះ គឺជាទំព័រថ្មីមួយបន្ថែមទៀតនៅក្នុងវិស័យកីឡាឡើងភ្នំ ដែលតាមរយៈនេះ អាចប្រែក្លាយសិស្សានុសិស្ស និងក្រុមកីឡាករដែលស្ម័គ្រចិត្តចូលរួមប្រកួតទៅជា កូនល្អ សិស្សល្អ មិត្តល្អ សាលារៀនស្អាត កីឡាករគំរូ ដែលអាចរីកដុះរដាលនៅគ្រប់ភូមិសិក្សា សម្រាប់ជាក្ដីសង្ឃឹម និង អនាគតរបស់កម្ពុជា ស្របតាមគោលនយោបាយជាតិស្ដីពីការ អភិវឌ្ឍវិស័យអប់រំកាយ និងកីឡា។
ជាមួយគ្នានេះផងដែរ ឯកឧត្តម សាយ សំអាល់ ប្រធានសហភាពសហព័ន្ធយុវជនកម្ពុជារាជធានីភ្នំពេញ បានសម្រេចសាងសង់បន្ថែមទីតាំងលេងកីឡាឡើងភ្នំនេះនៅអាគារខេមរានី នៃសហភាពសហព័ន្ធយុវជនកម្ពុជារាជធានីភ្នំពេញ ដើម្បីជំរុញបន្ថែមការចូលរួមលេងនិងអភិវឌ្ឍកីឡាឡើងភ្នំ ក៏ដូចជាធ្វើឱ្យអគារខេមរានីនៃសហភាពសហព័ន្ធយុវជនកម្ពុជារាជធានីភ្នំពេញក្លាយជាមជ្ឈមណ្ឌកីឡាចម្រុះមួយ។
កីឡាឡើងភ្នំចាប់ផ្ដើមមាននៅកម្ពុជាដំបូងនៅអំឡុងឆ្នាំ២០០៥ ដោយជនជាតិបរទេសចូលចិត្តកីឡាមួយនេះ។ ដោយមានទំនាក់ទំនងល្អ ហើយមានការចាប់អារម្មណ៍ពីប្រជាជនខ្មែរ យើងនៅខេត្តសៀមរាប និងរាជាធានីភ្នំពេញ បានចូលរួមលេងជាក្រុមជាមួយប្រទេសទាំងនោះ។ ការចូលរូមអភិវឌ្ឍប្រភេទកីឡានេះ ឱ្យកាន់តែមានភាពរីកចម្រើន និងមានការទទួលស្គាល់ជាផ្លូវការពីស្ថាប័ននានាក្នុងប្រទេសកម្ពុជា និង អន្តរជាតិ ជាពិសេស ក្រុមអ្នកនិយមកីឡាឡើងភ្នំ បានរៀបជាអ្នកផ្ដួចផ្ដើមបង្កើតសហព័ន្ធកីឡាឡើងភ្នំនេះឡើង ហើយក្លាយជាសមាជិកពេញសិទ្ធិអាណត្តិទី១របស់គណៈកម្មាធិការជាតិអូឡាំពិកកម្ពុជាដំបូងនៅថ្ងៃទី១០ ខែមករា ឆ្នាំ២០១១ មួយអាណត្តិមានរយៈពេល៤ឆ្នាំម្ដង។ នេះជាអាណត្តិទី៤នៃសហព័ន្ធកីឡាឡើងភ្នំកម្ពុជាដែលមានឯកឧត្ដម ឡាំង អូណា ជាប្រធាន៕
