អតីតតារាបាល់ទាត់ប្រេស៊ីល Robinho ដែលទើបតែបញ្ចប់ឆ្នាំទី១នៃការជាប់ពន្ធនាគាររយៈពេលប្រាំបួនឆ្នាំបទរំលោភបូក ត្រូវបានគេរាយការណ៍ថា កំពុងប្រឹងប្រែងធ្វើការយ៉ាងខ្លាំងជាមួយនឹងក្ដីសង្ឃឹមថា អាចទទួលបានការដោះលែងមុនកំណត់។
Robinho បានជាប់ពន្ធនាគារនៅចុងខែមីនាឆ្នាំ ២០២៤ និងនៅពន្ធនាគារ Tremembe ក្នុងក្រុង Sao Paulo ដែលជាកន្លែងត្រូវបានគេស្គាល់ថាឃុំឃាំងអ្នកទោសមានឋានៈខ្ពស់ រួមទាំងអ្នកនយោបាយពុករលួយ និងឃាតកធំៗ។ នេះបើតាមការចុះផ្សាយពី ESPN។
យោងតាម Marca ជីវិតក្នុងពន្ធនាគារ Robinho លើការស្តារនីតិសម្បទា។ គេបានរក្សាទំនាក់ទំនងល្អជាមួយអ្នកទោសផ្សេងទៀត ហើយត្រូវបានគេចាត់ទុកថាជាអ្នកទោសគំរូ។ ទម្លាប់ប្រចាំថ្ងៃរបស់គាត់រួមមានការលេងបាល់ទាត់ ការអាន ការថែសួន និងការរៀនជួសជុលគ្រឿងអេឡិចត្រូនិច ដូចជាទូរទស្សន៍ និងវិទ្យុជាដើម។ នៅក្រោមបទប្បញ្ញត្តិពន្ធនាគាររបស់ប្រទេសប្រេស៊ីល ពលកម្ម ១២ ម៉ោងអាចកាត់បន្ថយការកាត់ទោសជាប់ពន្ធនាគារមួយថ្ងៃ។
មេធាវីរបស់ Robinho លោក Mario Rosso បានឱ្យដឹងថា គេតែងរក្សាភាពឱនលំទោន និងស្ងៀមស្ងាត់។ គេជាអ្នកទោសគំរូ ហើយមិនមានបញ្ហាជាមួយអ្នកទោសផ្សេងទៀតទេ។
នៅពេលមកដល់ពន្ធនាគារ Robinho បានចំណាយពេល ១០នៅក្នុងការឃុំឃាំងតែម្នាក់ឯង មុនពេលត្រូវបានផ្ទេរទៅបន្ទប់រួមជាមួយអ្នកទោសអាយុ២២ ឆ្នាំដែលត្រូវបានកាត់ទោសពីបទញុះញង់ធ្វើអត្តឃាត។
យោងតាមសារព័ត៌មាន Daily Mail បានឱ្យដឹងថា គុកនោះអ្នកជាប់ឃុំប្រមាណ ២៥០០នាក់ ហើយបន្ទប់មួយៗអាចមានអ្នកទោសដល់៦នាក់។
ប្រភពដដែលបានរាយការណ៍ថា អ្នកទោសជាច្រើនត្រូវបានដោះលែងជាបណ្ដោះអាសន្នរយៈពេល១១ថ្ងៃកាលពីបុណ្យណូអែល ប៉ុន្តែ Robinho មិនមានលក្ខណៈគ្រប់គ្រាន់សម្រាប់ឯកសិទ្ធិនេះទេ ហើយមិនអាចចំណាយពេលថ្ងៃឈប់សម្រាកជាមួយប្រពន្ធ និងកូនបីនាក់របស់ពួកគេបានទេ។
Robinho អាចទទួលបានការផ្គត់ផ្គង់ជាមូលដ្ឋាន និងរបស់ប្រើប្រាស់ផ្ទាល់ខ្លួនពីគ្រួសារ ដូចជាអាហារ ភេសជ្ជៈ សំលៀកបំពាក់ សៀវភៅ ហ្គេម និងទស្សនាវដ្តី ឬសៀវភៅដែលមិនអាសអាភាស។
Robinho ត្រូវបានកាត់ទោសពីបទរំលោភបូកស្ត្រីជនជាតិអាល់បានីម្នាក់នៅក្នុងក្លឹបរាត្រីមួយក្នុងទីក្រុង Milan កាលពីឆ្នាំ 2013។ គេបានបដិសេធការចោទប្រកាន់នេះ ដោយបានសារភាពថាដេកជាមួយស្ត្រីនោះមែន តែជាការព្រមព្រៀងគ្នាប៉ុណ្ណោះ។
គេត្រូវបានតុលាការអ៊ីតាលីកាត់ទោសដំបូងក្នុងឆ្នាំ ២០១៧ ដោយការសម្រេចនេះត្រូវបានតម្កល់តាមរយៈការប្តឹងឧទ្ធរណ៍ជាច្រើន។
