អតីតខ្សែការពារជម្រើសជាតិម៉ារ៉ុក Mohamed Abarhoun បានបាត់បង់ជីវិតក្នុងវ័យ៣១ឆ្នាំ ដោយសារជំងឺមហារីកក្រពះ កាលពីថ្ងៃទី២ខែធ្នូឆ្នាំ២០២០។
គេបានពិនិត្យឃើញជំងឺនេះក្នុងខែកុម្ភៈ អំឡុងពេលលេងឱ្យក្លិប Caykur Rizespor ក្នុងលីគកំពូលទួរគី។ កាលខែតុលាកន្លងទៅ Abarhoun បាននិយាយថាគេមានអារម្មណ៍ប្រសើរនិងសង្ឃឹមថាអាចត្រលប់មកទីលានបាល់ទាត់វិញ។ តែជាអកុសល គេបានបាត់បង់ជីវិតដើមខែធ្នូនេះ។
Abarhoun បានចំណាយពេលលេងបាល់ទាត់អាជីព៧រដូវកាលនៅម៉ារ៉ុកជាមួយក្លិប Moghreb Tetouan ដែលគេបានឈ្នះជើងឯកលីគ២ដង រួចផ្ទេរទៅព័រទុយហ្គាល់ចូលរួម Moreirense មុនផ្ទេរមក Rizespor ឆ្នាំមុន។
នៅកម្រិតជម្រើសជាតិ Abarhoun បានលេងអូឡាំពិក២០១២សម្រាប់ម៉ារ៉ុក និងលេងពាន African Nations Championship 2014 ដែលសម្រាប់កីឡាករលេងលីគក្នុងស្រុកក្នុងប្រទេសនានានៅអាហ្វ្រិក៕
