យុវជន ហ៊ុយ ជ័យវរៈស័ក្តិ អ្នកចាំទីប្រចាំក្រុមបាល់ទាត់វិទ្យាល័យ ជាស៊ីម សាមគ្គី ក្នុងពេលប្រមូលផ្តុំហ្វឹកហាត់ត្រៀមសម្រាប់ពានរង្វាន់ជើងឯកវិទ្យាល័យរដូវកាលទី៥រូបគេបានលើកឡើងពីអារម្មណ៍សប្បាយចិត្តដែលខ្លួនអាចចូលរួមក្នុងពានរង្វាន់កម្រិតវិទ្យាល័យនេះសារជាថ្មី។ យ៉ាងណាមិញ អ្នកចាំទីថ្នាក់ទី១២រូបនេះក៏បានរំលឹកពីអនុស្សាវរីយដែលបន្សល់ទុកកាលពីឆ្នាំចាស់ដែលខ្លួនចងចាំមិនភ្លេចជុំវិញការប្រកួតដែលរងបរាជ័យក្រោមថ្វីជើងក្រុមវិទ្យាល័យព្រែកលៀបក្នុងលទ្ធផល១ទល់នឹង០ដោយមិនអស់ចិត្ត។
ម្ល៉ោះហើយពានរង្វាន់វិទ្យាល័យរដូវកាលទី៥នេះ អ្នកចាំទីវ័យ ១៧ឆ្នាំ រូបនេះដាក់គោលដៅយកឈ្នះក្រុមមួយនេះជាចាំបាច់ ដើម្បីជម្រះស្រមោលអន្តរកាលមួយនេះ។ ហ៊ុយ ជ័យវរៈស័ក្តិ ក៏បានលើកឡើងពីក្រុមមួយចំនួនទៀតដែលខ្លួនចង់តទល់សម្រាប់ឆ្នាំនេះ។
លើសពីនេះ វរៈស័ក្តិ ក៏បាននិយាយពីបទពិសោធមួយចំនួនដែលខ្លួនរៀនសូត្របានពីអតីតអ្នកចាំទីក្រុមវិទ្យាល័យមួយនេះយុវជន សាយ ចាន់តុលា អំពីរបៀបរបបនៃតំណែងជាអ្នកចាំទីបាល់ផងដែរ។ បន្ថែមពីនេះ រូបគេក៏បានលើកឡើងពីគោលដៅជួយវិទ្យាល័យក្នុងរដូវកាលនេះ សម្រាប់ឱកាសចុងក្រោយលេងក្នុងនាមជាសិស្សវិទ្យាល័យ៕
