មូលហេតុនៅពីក្រោយការចាកចេញរបស់ Trippier និង Chilwell ពីជំរំជម្រើសជាតិអង់គ្លេសមុនប្រកួតយប់នេះ

Monghak Yong
10 មើល
1 នាទីអាន
- Advertisement -

ខ្សែការពារស្លាបដ៏សំខាន់២រូបរបស់ក្រុមបាល់ទាត់ជម្រើសជាតិអង់គ្លេស Kieran Trippier និង Ben Chilwell បានដកខ្លួនចេញពីជំរំក្រុមតោកំណាចមុនការប្រកួតពានរង្វាន់ UEFA Nations League ទល់ ដាណឺម៉ាក ម៉ោង១៖៤៥យប់ថ្ងៃពុធទី១៤ខែតុលាឆ្នាំ២០២០នេះក្រោមហេតុផលផ្សេងៗគ្នា។


ខ្សែការពារស្លាបស្ដាំ Trippier ដែលបានពាក់ស្លាកប្រធានក្រុមក្នុងការប្រកួតមិត្តភាពឈ្នះ វេលស៍ ៣-០ កាលពីថ្ងៃទី៨ខែតុលា និងបានចាប់ផ្ដើមការប្រកួតក្នុងជ័យជម្នះ២-១លើ បែលហ្ស៊ិក កាលពីថ្ងៃទី១១ខែតុលាកន្លងទៅនោះ បានដកខ្លួនពីការប្រកួតបន្ទាប់នេះ ដើម្បីទៅដោះស្រាយបញ្ហាផ្ទាល់ខ្លួនក្នុងសវនាការរបស់សហព័ន្ធកីឡាបាល់ទាត់អង់គ្លេសពាក់ព័ន្ធករណីភ្នាល់។

អតីតសមាជិក Man City, Barnsley និង Burnley វ័យ២៩ឆ្នាំរូបនេះរងការចោទក្នុងខែឧសភាពីបទអាកប្បកិរិយាមិនត្រឹមត្រូវ ជុំវិញការផ្ទេររបស់គេពី Tottenham ទៅ Atletico Madrid ក្នុងតម្លៃ២១.៧លានផោនកាលពីខែកក្កដាឆ្នាំ២០១៩។ ប៉ុន្តែ Trippier ទទូចថាគេពុំដែលកេងចំណេញពីការភ្នាល់ក្នុងបាល់ទាត់ ឬក៏កេងចំណេញតាមរយៈការឱ្យនរណាភ្នាល់ជំនួសគេនោះឡើយ។


ចំណែក ខ្សែការពារស្លាបឆ្វេង Chilwell ដែលទើបផ្លាស់ចេញពី Leicester City ទៅចូលរួម Chelsea ក្នុងរដូវកាលថ្មីនេះ បានដកខ្លួនត្រលប់ទៅក្លិបវិញ ដោយសារបញ្ហារបួសដែលគេមានតាំងពីមុនមកចូលជំរំហ្វឹកហាត់របស់លោក Gareth Southgate។

អវត្តមានរបស់ Trippier និង Chilwell នឹងជាឱកាសសម្រាប់កីឡាករវ័យក្មេងរបស់ Arsenal គឺ Bukayo Saka និង Ainsley Maitland-Niles ដើម្បីលេងក្នុងជម្រើស១១នាក់របស់លោក Southgate៕

គូប្រកួត UEFA Nations League យប់​ថ្ងៃ​ពុធ​ទី​១៤​ខែ​តុលា​ឆ្នាំ​២០២០​នេះ​៖

Follow:
លោក យ៉ុង ម៉ុងហាក់ ជា ពិធីករ អ្នកអត្ថាធិប្បាយ និង ជាការីនិពន្ធព័ត៌មានកីឡា ដែលមាន បទពិសោធការងារនៅស្ថាប័នធំៗមួយចំនួនក្នុងប្រទេសកម្ពុជា ទាំងទូរទស្សន៍ និង វេបសាយ។ លោក ម៉ុងហាក់ បាននិងកំពុងបំពេញការងារជាអ្នកសារព័ត៌មានកីឡា១០ឆ្នាំមកហើយ ។ លោក មានចំណេះដឹងកីឡាទាំងជាតិនិងអន្តរជាតិយ៉ាងច្បាស់លាស់ និងបរិយាយប្រកបដោយវិជ្ជាជីវៈ។ សព្វថ្ងៃ​លោកជា​និពន្ធនាយកប្រចាំ AMS SPORTS៕