ការប្រកួតដណ្ដើមជើងឯកក្លិបបាល់ទាត់ពិភពលោក FIFA Club World Cup 2021 នឹងធ្វើនៅអារ៉ាប់រួមអេមីរ៉ាត់ ពីថ្ងៃទី៣ដល់ថ្ងៃទី១២ខែកុម្ភៈឆ្នាំ២០២២ ដោយមានជើងឯកមកពី៦ទ្វីបផ្សេងគ្នា និងក្លិបជើងឯកលីគកំពូលរបស់ប្រទេសម្ចាស់ផ្ទះមួយផងដែរ។
ក្រុមគីឡូធ្ងន់២ដែលជាបេក្ខភាពសង្ឃឹមលើកពានប្រចាំឆ្នាំ គឺជើងឯកទ្វីបអឺរ៉ុប និងជើងឯកទ្វីបអាមេរិកខាងត្បូង ដូចសព្វមួយដង ត្រូវបានដាក់ឱ្យរង់ចាំក្នុងវគ្គពាក់កណ្ដាលផ្ដាច់ព្រ័ត្រ ដោយនៅខ្នែងផ្សេងគ្នា។
ហើយជាលទ្ធផលនៃការចាប់ឆ្នោតកាលថ្ងៃចន្ទទី២៩ខែវិច្ឆិកាឆ្នាំ២០២១ នៅខ្នែងខាង Chelsea ដំបូងក្រុមជើងឯកលីគកំពូលអារ៉ាប់រួមអេមីរ៉ាត់ Al Jazira ត្រូវប្រកួតជុំបឋមជាមួយក្រុមតំណាងទ្វីបអូសេអានី Auckland City ដែលត្រូវបានជ្រើសរើសដោយ OFC ដោយផ្អែកលើចំណាត់ថ្នាក់និងលទ្ធផលក្នុងរយៈពេលពី២០១៦ដល់២០២០នៃក្រុមទាំងអស់ក្នុងពាន OFC Champions League បន្ទាប់ពីពាន OFC Champions League 2021 ត្រូវបានលុបចោលដោយសារបញ្ហាកូវីដ១៩។ អ្នកឈ្នះនឹងឡើងទៅជុំទី២ ប៉ះជើងឯកទ្វីបអាស៊ី Al Hilal ដើម្បីដណ្ដើមកៅអីទៅជួបម្ចាស់ពាន UEFA Champions League ក្នុងពាក់៤ក្រុមចុងក្រោយ។
នៅខ្នែងខាង Palmeiras ដែលជាជើងឯក Copa Libertadores វិញ ក្រុមរបស់ប្រេស៊ីលមួយនេះ កំពុងរង់ចាំអ្នកឈ្នះរវាងជើងឯកទ្វីបអាហ្វ្រិក Al Ahly និងជើងឯកខុនខាខាហ្វ Monterrey ដើម្បីប្រកួតគ្នាក្នុងវគ្គពាក់កណ្ដាលផ្ដាច់ព្រ័ត្រ។
កាលបរិច្ឆេទជុំទី២និងវគ្គពាក់កណ្ដាលផ្ដាច់ព្រ័ត្រនៅមិនទាន់សម្រេចទាំងស្រុងនៅឡើយ តែថ្ងៃផ្ដាច់ព្រ័ត្រគឺថ្ងៃទី១២ខែកុម្ភៈ៕
រូបថត៖ FIFA
