Cristiano Ronaldo ជាកំពូលតារាបាល់ទាត់ដ៏ល្បីរន្ទឺបំផុតម្នាក់ក្នុងពិភពលោក តាមរយៈទេពកោសល្យស៊ុតបញ្ចូលទីដ៏អស្ចារ្យរបស់គេ និងសមិទ្ធផលឯតទគ្គកម្មយ៉ាងច្រើនលើសលប់ដែលគេសម្រេចបាននៅក្នុងអាជីព។
មនុស្សជាច្រើនលាននាក់នៅជុំវិញផែនដីស្គាល់ច្បាស់អំពី Ronaldo និងអ្វីដែលគេបានធ្វើនៅលើទីលានបាល់ទាត់។ ប៉ុន្តែជីវិតឯកជនរបស់ Ronaldo ជាមួយកូនៗវិញពុំសូវមានអ្នកដឹងប៉ុន្មានទេ ដ្បិតមានភាពអាថ៌កំបាំងច្រើនគួរសម ព្រោះព័ត៌មានលម្អិតមិនត្រូវបាន Ronaldo បង្ហាញឱ្យដឹងជាសាធារណៈនោះទេ ខណៈក្នុងអតីតកាល Ronaldo បានផ្លាស់ប្ដូរដៃគូស្នេហាជាច្រើននាក់។ ទោះយ៉ាងនេះក្ដី មានរឿងខ្លះត្រូវបានម្ចាស់អាវលេខ៧ក្លិប Manchester United បង្ហោះលើបណ្ដាញសង្គម។
ចុងក្រោយបង្អស់ កាលពីថ្ងៃចន្ទទី១៨ខែមេសាឆ្នាំ២០២២ Ronaldo បានចេញលិខិតចំហមួយប្រកាសឱ្យដឹងថាគេជាមួយមិត្តស្រី Georgina Rodriguez មានទុក្ខជាទម្ងន់ដោយបានបាត់បង់កូនប្រុសម្នាក់ បន្ទាប់ពីកូនភ្លោះរបស់ពួកគេបានកើតមួយរយៈខ្លី។ ទោះយ៉ាងណា ជាសំណាងល្អ កូនស្រីនៅរស់រាន ដែលផ្ដល់ក្ដីសង្ឃឹមនិងកម្លាំងចិត្តខ្លះលើកទឹកចិត្តដល់ CR7 និង Georgina។
ជាមួយវត្តមានកូនស្រីដែលទើបកើតចុងក្រោយបង្អស់នេះ តើ Ronaldo មានកូនសរុបប៉ុន្មាននាក់ហើយ? ហើយនរណាខ្លះជាម្ដាយរបស់ពួកគេ?
AMS Sports សូមបង្ហាញជូនលោកអ្នកនូវរឿងរ៉ាវដូចខាងក្រោម។
គិតត្រឹមខែមេសាឆ្នាំ២០២២នេះ Ronaldo មានកូនសរុប៥នាក់ហើយ គឺ Cristiano Jr, Eva, Mateo, Alana និងកូនស្រីពៅដែលទើបកើតកាលពីថ្ងៃទី១៨ខែមេសា។
កូនប្រុសច្បង Cristiano Jr មានអាយុ១២ឆ្នាំ និងកំពុងស្ថិតក្នុងក្រុមយុវជនរបស់ក្លិប Manchester United។ Cristiano Jr រកបានគ្រាប់បាល់រឿយៗក្នុងក្រុមយុវជននិងថែមទាំងប្រើស្ទីលអបអរគ្រាប់បាល់ដូចឪពុករបស់គេទៀតផង។ Cristiano Jr បានកើតនៅថ្ងៃទី៤ខែកក្កដាឆ្នាំ២០១០នៅរដ្ឋកាលីហ្វ៉ញ៉ា សហរដ្ឋអាមេរិក តាមរយៈការពពោះជំនួស។ អត្តសញ្ញាណនៃម្ដាយរបស់កូននេះត្រូវបានលាក់ជាការសម្ងាត់ដោយសារ Ronaldo បានព្រមព្រៀងជាមួយនារីនោះដើម្បីរក្សារឿងគ្រប់យ៉ាងជាអាថ៌កំបាំង។
បន្ទាប់មក ក្នុងឆ្នាំ២០១៧ Ronaldo បានប្រកាសជាថ្មីថាគេមានកូន២នាក់ថែមទៀតតាមរយៈការបង្កកំណើតសិប្បនិម្មិតដដែល ហើយលើកនេះគឺកូនភ្លោះ Eva និង Mateo។ ម្ដាយរបស់កូនភ្លោះទាំង២ក៏មិនត្រូវបានទម្លាយឱ្យដឹងដែរ គឺលាក់ជាការសម្ងាត់ដូចមុនអីចឹង។
នៅក្នុងឆ្នាំ២០១៧ដដែលនោះ គឺបន្ទាប់ពីស្រឡាញ់គ្នាបានជាង១ឆ្នាំជាមួយ Georgina Rodriguez កំពូលខ្សែប្រយុទ្ធព័រទុយហ្គាល់ បានប្រកាសជាសាធារណៈថា Georgina មានផ្ទៃពោះ។ នៅខែវិច្ឆិកាឆ្នាំ២០១៧ កូនដំបូងរបស់ Ronaldo ជាមួយ Georgina បានកើត នោះគឺ Alana ដែលជាកូនសរុបទី៤របស់ Ronaldo។ ម្ចាស់ពាន Ballon d’Or ៥សម័យ បានប្រកាសដោយការថតសែលហ្វ៊ីជាមួយ Cristiano Jr និង Georgina ក្រោយពេលផ្ដល់កំណើតដល់ Alana។
ចុងក្រោយបង្អស់ នៅថ្ងៃទី១៨ខែមេសាឆ្នាំ២០២២ Georgina ដដែលបានផ្ដល់កំណើតកូនភ្លោះសម្រាប់ Ronaldo ប៉ុន្តែជាអកុសល ដោយសារភាពស្មុកស្មាញនៃការឆ្លងទន្លេ កូនភ្លោះនោះនៅមានជីវិតតែម្នាក់ប៉ុណ្ណោះ គឺជាកូនស្រី ដែលជាកូនទី៥របស់ Ronaldo គិតមកទល់ពេលនេះ៕
ប្រភព៖ Marca
