ការប្រកួតបាល់ទាត់ពានរង្វាន់សម្តេចអគ្គមហាសេនាបតីតេជោ ហ៊ុន សែន រដូវកាល២០២២ ឈានដល់វគ្គ៨ក្រុមចុងក្រោយហើយដោយជើងទី១នឹងចាប់ផ្ដើមក្នុងពាក់កណ្ដាលសប្ដាហ៍នេះ។
សមាសភាពក្រុមដែលឡើងដល់វគ្គ៨ក្រុមចុងក្រោយលើកនេះខុសប្លែកពីវគ្គ១/៤ឆ្នាំមុនបន្តិច ពិសេសវត្តមានក្រុមមកពីលីគ២ កោះកុងអេហ្វស៊ី ដែលបានផ្ដួលក្រុមលីគកំពូល អង្គរថាយហ្គឺរ យ៉ាងគួរឱ្យភ្ញាក់ផ្អើលក្នុងវគ្គ១៦ក្រុមកន្លងទៅ ជាមួយគ្រាប់បាល់សរុប៤-៣។ ឆ្នាំមុន កោះកុងអេហ្វស៊ី បានធ្លាក់ត្រឹមវគ្គ១៦ក្រុម ក្រោមថ្វីជើង ព្រះខ័នរាជស្វាយរៀង ១ទល់នឹង៦។
![](https://asset.ams.com.kh/sports/media/300032456_1937301559793023_8167105735548083850_n-1024x683.jpg)
មួយទៀត ក្រុមកងយោធពលខេមរភូមិន្ទដែលជាក្រុមជោគជ័យបំផុតមួយក្នុងពានដែលប្រើប្រាស់តែកីឡាករខ្មែរ ពុំមានបរទេសចូលលេងនេះ ក៏បានឡើងដល់វគ្គខ្ពស់ជាងរដូវកាលមុនផងដែរ។ រដូវកាលមុន ក្រុមខ.ភ.ម បានធ្លាក់ត្រឹមវគ្គ១/៨ក្រោមថ្វីជើង អគ្គិសនីកម្ពុជា ០-៤។ តែរដូវកាលនេះ ក្រុមដែលមានលោក ហោ សុខហេង ជាគ្រូបង្គោល បានឡើងមកដល់វគ្គ៨ក្រុមចុងក្រោយ បន្ទាប់ពីទម្លាក់ក្រុមលីគ២ នគរបាលជាតិ ដោយលទ្ធផល៤-២។
ចំណែក វិសាខា បឹងកេត ភ្នំពេញក្រោន ព្រះខ័នរាជស្វាយរៀង អគ្គិសនីកម្ពុជា និង ណាហ្គាវើលដ៍ សុទ្ធតែបានឡើងដល់វគ្គនេះឆ្នាំមុន។
![](https://asset.ams.com.kh/sports/media/299966502_1937301526459693_8744442393556683184_n-1024x684.jpg)
សម្រាប់ការប្រកួតជើងទី១វគ្គ៨ក្រុមចុងក្រោយពានសម្ដេចហ៊ុនសែនឆ្នាំ២០២២ពាក់កណ្ដាលសប្ដាហ៍នេះ ក្រុមភ្នំពេញក្រោន នឹងស្វាគមន៍ ក្រុមណាហ្គាវើលដ៍ ម៉ោង៦៖៣០ល្ងាច, ក្រុមអគ្គិសនីកម្ពុជា ទទួល ព្រះខ័នរាជស្វាយរៀង ម៉ោង៣៖៣០រសៀល, ក្រុមវិសាខា ត្រូវធ្វើដំណើរទៅសួរសុខទុក្ខ កង យោធពលខេមរភូមិន្ទ ម៉ោង៦៖៣០ល្ងាច រីឯ បឹងកេត លេងនៅទឹកដី កោះកុង អេហ្វស៊ី ម៉ោង៣៖៣០រសៀល នៅទីលានវិទ្យាល័យ តេជោសែន ខេត្តកោះកុង។
រីឯជើងទី២ នឹងធ្វើនៅថ្ងៃពុធទី៣១ខែសីហាឆ្នាំ២០២២ ដោយផ្លាស់ប្ដូរទឹកដីទៅវិញទៅមក។
![](https://asset.ams.com.kh/sports/media/299940507_1940695979453581_3494191633820107523_n-1-1024x1024.jpg)
គួររំឭកផងដែរថា ក្នុងវគ្គ១៦ក្រុមចុងក្រោយកន្លងទៅ អគ្គិសនីកម្ពុជា បានប្រកួតឈ្នះ គិរីវង់សុខសែនជ័យ ៤-៣, ព្រះខ័នរាជស្វាយរៀង ឈ្នះ សូលទីឡូអង្គរ ៥-០, វិសាខា ឈ្នះ សៀមរាបអេហ្វស៊ី ៩-២, ណាហ្គាវើលដ៍ ឈ្នះ អាស៊ីអឺរ៉ុប៤-០, បឹងកេត ឈ្នះ អាយអេសអាយដង្កោសែនជ័យ ៥-២, ភ្នំពេញក្រោន ឈ្នះ ព្រៃវែងអេហ្វស៊ី ៥-៤៕