ក្រុមបាល់បោះនារីជិះរទេះកម្ពុជាហាត់ចេះវិធីរំដោះខ្លួនពីការតាមបិទដោយគូប្រជែងបានហើយ មុនចូលរួមព្រឹត្តិការណ៍កីឡាអាស៊ីប៉ារ៉ាហ្គេម នៅក្រុងហាងចូវ ប្រទេសចិន ឆ្នាំ២០២៣នេះ។ នេះបើតាមការឱ្យដឹងពីលោក មុយ សុឺ ដែលជាគ្រូបង្វឹក។
គ្រូបង្វឹកដដែលថ្លែងថា កាលពីមុន កូនក្រុមពិការរំដោះខ្លួនពេលមានការតាមបិទពីគូប្រជែងម្ដងៗ ដោយសារតែការហ្វឹកហាត់យ៉ាងជាប់លាប់ ចាប់តាំងពីចប់ព្រឹត្តិការណ៍កីឡាអាស៊ានប៉ារ៉ាហ្គេមនៅភ្នំពេញ។ ទន្ទឹមនេះ កូនក្រុមក៏មានសមត្ថភាពស៊ុតច្បាស់ជាងមុនដែរ។
ចំណែកកីឡាការិនី សៀង សុខច័ន្ទ និងកីឡាការិនី អាន ស្រីណែត បានបង្ហាញការប្ដេជ្ញាចិត្តខ្ពស់ដើម្បីយកលទ្ធផលល្អជូនប្រទេសជាតិ។
ទន្ទឹមនឹងនេះ លោក ម៉ៅ សុខជា មន្ត្រីគណៈកម្មាធិការជាតិប៉ារ៉ាឡាំពិកកម្ពុជា ថ្លែងថា ការប្រកួតអាស៊ីប៉ារ៉ាហ្គេម នៅប្រទេសចិន ឆ្នាំនេះ កម្ពុជាបញ្ជូនអត្តពលិកចូលរួមប្រកួតលើ៦ប្រភេទកីឡា គឺ អត្តពលកម្ម ហែលទឹក វាយកូនឃ្លីលើតុ បាល់ទះអង្គុយ បាល់ បោះ ជិះរទេះ និងកីឡាវាយសី។
សម្រាប់កីឡាបាល់បោះអង្គុយជិះរទេះនារីវិញ បានសិទ្ធិចូលរួមព្រឹត្តិការណ៍ដ៏ធំនេះបន្ទាប់ពីឆ្លងកាត់វគ្គជម្រុះយ៉ាងស្វិតស្វាញ។
ការប្រកួតដំបូងរបស់ក្រុមនារីកម្ពុជា ត្រូវប៉ះក្រុមនារីឡាវ, ថៃ, ចិន, ជប៉ុន និងអុីរ៉ង់ដោយត្រូវតទល់ក្រុមនារីឡាវ។ ការប្រកួតដំបូង គឺត្រូវជួបក្រុមឡាវ ថ្ងៃទី១៩ ខែតុលា៕
