លោក ចាន់ សំភី ជាគ្រូបង្ហាត់លំហាត់ប្រាណមួយរូបនៅមាត់ទន្លេបាសាក់ក្រុងតាខ្មៅ ខេត្តកណ្ដាល តាំងពីឆ្នាំ២០០៧ម្ល៉េះ។ លោកថា ពេលចាប់ផ្ដើមបង្ហាត់ដំបូងៗនាពេលនោះ មិនមានមនុស្សច្រើនទេហាត់ប្រាណ ពោលស្ងាត់ជ្រងំ តែក្រោយមក មានមនុស្សហាត់ប្រាណកាន់តែច្រើនឡើងជាងមុន។
ទាក់ទងទៅនឹងការបង្ហាត់ប្រាណ បុរសមានលំនៅនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ រំឭកថា ដំបូងឡើយ គ្រាន់តែជាអ្នកហាត់ប្រាណធម្មតាៗប៉ុណ្ណោះ តែក្រោយហាត់បានមួយឆ្នាំ លោកក៏ត្រូវបានផ្ដល់ឱកាសជាគ្រូបង្ហាត់ ហើយក៏ចូលបង្ហាត់ពលរដ្ឋនៅក្រុងតាខ្មៅនេះរហូតមក។ លោកថា ការហាត់ប្រាណពិតជាមានសារៈសំខាន់ខ្លាំង ជាពិសេសជិត២០ឆ្នាំមកនេះ លោកមិនដែលកោសខ្យល់សូម្បីតែម្ដង។
លោក ចាន់ សំភី ក៏បានសំណូមពរឱ្យជនរួមជាតិឆ្លៀតពេលយ៉ាងណា ហាត់ប្រាណដើម្បីបានសុខភាពល្អ៕
