កាលពីពេលថ្មីៗនេះធនាគារ មេយប៊ែង បានធ្វើការចុះអនុស្សរណៈនៃការយោគយល់ជាមួយ សហភាពសហព័ន្ធយុវជនកម្ពុជារាជធានីភ្នំពេញ (ស.ស.យ.ក. រាជធានីភ្នំពេញ) លើកិច្ចសហការអភិវឌ្ឍកម្មវីធីពង្រឹងសិទ្ធិអំណាចយុវជន និងលើកកម្ពស់ការចូលរួមក្នុងសហគមន៍។ ដោយពិធីចុះហត្ថលេខានៃការយោគយល់នេះ ធ្វើឡើងក្រោមអធិបតីភាព លោក រ័ត្ន សោភ័ណ នាយកប្រតិបត្តិ និងជានាយកប្រចាំប្រទេស នៃធនាគារ មេយប៊ែង ខេមបូឌា និង ឯកឧត្តម បែ មករា សមាជិកគណៈអចិន្ត្រៃយ៍ ស.ស.យ.ក. រាជធានីភ្នំពេញ និងជានាយកកម្មវិធីកីឡាភ្នំពេញ។
តាមរយៈកិច្ចសហប្រត្តិបត្តិការរវាងស្ថាប័នទាំងពីរបានផ្តួចផ្តើមគំនិតគ្នាជាច្រើនក្នុងការអភិវឌ្ឍសហគមន៍ ក្នុងគោលបំណងលើកកម្ពស់ការចូលរួម ការអប់រំ និងជំរុញទឹកចិត្ត យុវជនកម្ពុជា។ ជាមួយគ្នាដែរ កិច្ចសហការមួយនេះក៏នឹងជះផលវិជ្ជមានទៅដល់វិស័យកីឡាផងដែរ តាមការបញ្ជាក់ស្ថាប័នទាំងពីរគ្រោងនឹងបង្កើតកម្មវីធី ហ្វឹកហាត់កីឡាបាល់ទាត់លំដាប់អន្តរជាតិ (Football Clinic) ដែលពាំនាំមកនៅក្រុមគ្រូៗលំដាប់អន្តរជាតិមកពីបរទេសដែលមានចំណេះជំនាញច្រើនឆ្នាំក្នុងវិស័យកីឡាបាល់ទាត់មកចែករំលែកនៅបទពិសោធដល់យុវជនកម្ពុជា។
ធនាគារ មេយប៊ែង និងសហភាពសហព័ន្ធយុវជនកម្ពុជារាជធានីភ្នំពេញ ចាត់ទុកពិធីចុះហត្ថលេខាលើអនុស្សរណៈនៃការយោគយល់នេះគឺជាការចាប់ផ្តើម ក្នុងដំណើរដ៏យូអង្វែងជាមួយគ្នាក្នុងការចូលរួមពង្រឹងសមត្ថភាពយុវជនបង្កើតឱកាសប្រកបដោយបរិយាបន្ន និងគាំទ្រដល់គោលដៅអភិវឌ្ឍរបស់ប្រទេសកម្ពុជា។ ដោយអនុស្សរណៈនៃការយោគយល់នេះក៏បានបើកទ្វារសម្រាប់គំនិតផ្តួចផ្តើមសង្គមផ្សេងៗនាពេលអនាគត ក្រៅពីវិស័យកីឡា ដូចជាវិស័យអប់រំ ការងារស្ម័គ្រចិត្ត និងយុទ្ធនាការផ្សព្វផ្សាយការយល់ដឹងជាសាធារណៈ ដែលនឹងផ្តល់អត្ថប្រយោជន៍ដល់សហគមន៍កាន់តែទូលំទូលាយ៕
