វិស័យបាល់ទាត់នារីនៅកម្ពុជាក្នុងពេលបច្ចុប្បន្នមិនទាន់មានភាពផុសផល់ខ្លាំងប៉ុន្មានឡើយជាក់ស្តែងកត្តាខ្វះនៅធនធានកីឡាការិនី និងម្ចាស់ឧបត្ថម្ភផ្សេងៗមិនថាបាល់ទាត់នារីទូទៅ ឬដល់កម្រិតអាជីព ជាមួយគ្នានេះលោក ឃួន ឡាបូរ៉ាវី គ្រូជំនួយក្រុមជម្រើសជាតិនារីកម្ពុជាបានលើកឡើងថាក្នុងឱកាសដែលក្រុមជម្រើសជាតិនារីកម្ពុជាមានការប្រកួតកម្រិតអន្តរជាតិក្នុងពេលបច្ចុប្បន្ន និងនាពេលអនាគតលោកជឿជាក់ថានឹងអាចជាកត្តាជំរុញទៅដល់អ្នកមានធនធានឱ្យងាកមកចូលរួមជ្រោមជ្រែងជាមួយបាល់ទាត់នារីឱ្យកាន់តែរីកចម្រើនបន្ថែមមួយកម្រិតទៀត។
លោកលើកឡើងដូច្នេះ ក៏ព្រោះតែវិស័យបាល់ទាត់នារីក្នុងពេលបច្ចុប្បន្នពុំទាន់មានយកចិត្តទុកដាក់ខ្លាំងនៅឡើយ ម្ល៉ោះហើយការផលិតនៅធនធានកីឡាការិនីក៏នៅយឺតយ៉ាវនៅឡើយ។ គ្រូបង្វឹកមានប្រភពពីខេត្តកំពង់ចាមបន្តថាការផលិតធនធានកីឡាករ-កីឡាការិនីដែលមានប្រសិទ្ធភាពខ្ពស់គួរធ្វើឡើងតាំងតែពីកម្រិតតូចៗមកម្ល៉េះ។
រំឭឹកថា បាល់ទាត់នារីកម្ពុជាអាជីពទើបតែមានជាង ៤ឆ្នាំចុងក្រោយនេះទេ ពិសេសគឺមុនពេលការប្រកួតកីឡា ស៊ីហ្គេម កាលពីឆ្នាំ ២០២៣ គ្រាកម្ពុជាធ្វើជាម្ចាស់ផ្ទះ ប៉ុន្តែក៏បានបង្កើតកំណត់ត្រាជាលើកដំបូងក្នុងការឡើងទៅកាន់វគ្គពាក់កណ្តាលផ្តាច់ព្រ័ត្រជាលើកដំបូងក្នុងប្រវត្តិសាស្ត្ររបស់ខ្លួន។ លើសពីនេះកាលពីឆ្នាំ ២០២៤ កន្លងទៅ ក្រុមនារីកម្ពុជាទទួលបានចំណាត់ថ្នាក់លេខ ២ ក្នុងការប្រកួតពាននារីអាស៊ាន ASEAN Women’s Cup នៅប្រទេសឡាវ៕
