ក្លិប Wolverhampton Wanderers សង្ឃឹមថាខ្សែប្រយុទ្ធ Raul Jimenez នឹងអាចចាកចេញពីមន្ទីរពេទ្យដើមសប្ដាហ៍ក្រោយ បន្ទាប់ពីធ្វើការវះកាត់ព្យាបាលលលាដ៍ក្បាលស្រាំ ក្រោយទង្គិចនឹងក្បាល David Luiz អំឡុងការប្រកួតនៅទឹកដី Arsenal ចុងសប្ដាហ៍មុន។
កីឡាករជម្រើសជាតិម៉ិកស៊ីកូវ័យ២៩ឆ្នាំត្រូវបានដាក់អុកស៊ីហ្ស៊ែនភ្លាមៗនៅលើទីលាន មុនពេលបញ្ជូនទៅមន្ទីរពេទ្យដើម្បីវះកាត់។
វេជ្ជបណ្ឌិតប្រចាំក្លិប Wolves លោក Matt Perry បាននិយាយកាលថ្ងៃពុធទី២ខែធ្នូឆ្នាំ២០២០ថា Jimenez កំពុងសះស្បើយបណ្ដើរៗយ៉ាងល្អនៅក្នុងមន្ទីរពេទ្យ។
លោក Perry បញ្ជាក់ថា៖ «ពួកយើងសោមនស្សណាស់ចំពោះដំណឹងមកពីអ្នកឯកទេសព្យាបាលរបស់គាត់ គឺគាត់កំពុងវិវឌ្ឍយ៉ាងល្អប្រសើរ។ គាត់គួរតែអាចចេញពីមន្ទីរពេទ្យបាននៅដើមសប្ដាហ៍ក្រោយ។ របួសប្រភេទនេះគឺស្មុគស្មាញ ហើយរយៈពេលព្យាបាលគឺមិនច្បាស់លាស់ ប៉ុន្តែអ្វីដែលច្បាស់លាស់អាចនិយាយបានគឺថាអ្វីដែល Raul ត្រូវការបន្ទាន់បំផុតគឺលំហ ការសម្រាក និងសន្តិភាព»។
Jimenez បានបង្ហោះលើ Twitter របស់គេថាគេសង្ឃឹមថាបានត្រលប់មកទីលានប្រកួតវិញឆាប់ៗ។
រដូវកាលមុនគេរកបាន១៧គ្រាប់ជួយ Wolves បញ្ចប់រដូវកាលក្នុងលេខរៀងទី៧ក្នុង Premier League។
សូមជម្រាបផងដែរថាក្រោយការប៉ះទង្គិចក្បាលគ្នាខ្លាំងរវាង Luiz និង Wolves មានសំណូមពរពីអ្នកវិភាគមួយចំនួនដើម្បីឱ្យបង្កើតបទបញ្ជាផ្លាស់ប្ដូរពិសេសសម្រាប់កីឡាកររបួសក្បាលក្នុងការប្រកួត៕
