ចចាមអារ៉ាម នៃការដោះដូរថ្ងៃ ព្រហស្បតិ៍ ទី០៣ ខែធ្នូ

អ្នកចាត់ការក្លិប Tottenham Hotspur លោក Jose Mourinho ចង់បានខ្សែការពារលំដាប់កំពូលមួយរូប បន្ថែមនៅក្នុងក្រុមដែលមានស្រាប់ នៅពេលទីផ្សារដោះដូរនៅខែមករាត្រូវបានបើកឱ្យដំណើរការ នេះបើតាមការអះអាងរបស់អ្នកសារព័ត៌មានអ៊ីតាលី Fabrizio Romano ដែលចុះផ្សាយ ពីសារព័ត៌មាន The Sun។ ប្រភពដដែល ក៏បានលើកឡើងផងដែរថាក្លិប Inter Milan ត្រូវការលុយជាចាំបាច់ ហើយពួកគេចង់លក់កីឡាករល្អបំផុតមួយនាពេលដ៏ខ្លីខាងមុខនេះ។ ហើយក្លិបមាន់ខ្នាយមាស មានការផ្សារភ្ជាប់ជាមួយ Milan Skriniar អំឡុងការដោះដូររដូវក្ដៅកន្លងទៅ។ការចរចាផ្ទេរខ្សែការពារវ័យ២៥ឆ្នាំ កៀកនឹងកើតមានឡើងនៅពេលដែល Spurs ប្រកាសចែកផ្លូវគ្នាជាមួយខ្សែការពារកណ្ដាល Jan Vertonghen ដែលបានចាកចេញទៅ Benfica ដោយមិនមានតម្លៃផ្ទេរ។ បន្ទាប់មកលោក Mourinho បាននាំយកខ្សែការពារ Joe Rodon ពី Swansea មកជំនួសកីឡាករបែលហ្ស៊ិក។ ទោះយ៉ាងណាក្ដី Spurs នៅតែចង់បាន Skriniar ដែលមានតម្លៃផ្ទេរប្រមាណ ៤៥លានផោន ដើម្បីពង្រឹងតំបន់ការពារ ស្របពេលដែលអនាគតរបស់ Toby Alderweireld និង Davinson Sanchez ស្ថិតនៅក្នុងភាពស្រពេចស្រពិល។
ក្លិប Newcastle United សម្លឹងឃើញខ្សែការពារវ័យក្មេង Brandon Williams របស់ Manchester United ដែលទើបតែមានអាយុ២១ឆ្នាំ ដោយត្រៀមសំណើសម្រាប់កិច្ចសន្យាខ្ចី ពេលទីផ្សារដំណើរការនៅខែមករាខាងមុខនេះ។ នេះបើយោងតាម Newcastle Chronicle។ Williams ជាកីឡាករដ៏មានសក្ដានុពលម្នាក់ ដែលអាចលេងតំណែងជា ខ្សែការពារស្លាបឆ្វេងក៏បាន និង ការពារស្លាបស្ដាំក៏បានផងដែរ ទើបធ្វើឱ្យក្លិបសារិកាព្រៃចង់បានរូបគេមកជួយក្រុម។ ប៉ុន្ដែ ពួកគេនឹងត្រូវប្រជែងជាមួយ Southampton ដែលចង់បានកីឡាករកើតចេញពីថ្នាលរបស់ Man United រូបនេះ ដោយត្រៀមកិច្ចសន្យាខ្ចី ពាក់កណ្ដាលចុងក្រោយនៃរដូវកាលនេះ បន្ទាប់ពីបរាជ័យក្នុងការនាំយក រូបគេមកកាន់ទឹកដី St. Mary កាលពីខែកញ្ញា។
Leicester City ចាប់ផ្ដើមមានសង្ឃឹមជាថ្មី សម្រាប់ការផ្សារភ្ជាប់ជាមួយ ខ្សែបម្រើការពារ William Carvalho ដែលជាកីឡាករគោលដៅយូរអង្វែងរបស់ពួកគេ បន្ទាប់ពីក្លិប Real Betis មានគម្រោងលក់កីឡាករព័រទុយហ្គាល់រូបនេះ ដើម្បីយកលុយមកចំណាយលើការពង្រឹងក្រុមពេលទីផ្សារដោះដូររដូវរងារបើកទ្វារ។ សារព័ត៌មានព័រទុយហ្គាល់ La Razon បានចុះផ្សាយថា បញ្ហានៅតំបន់ការពារ បានបង្ខំ Real Betis នាំយកកីឡាករថ្មីចូលក្រុមនៅខែមករាខាងមុខនេះ។ ប៉ុន្ដែពួកគេត្រូវលក់ Carvalho ដើម្បីបានលុយទិញខ្សែការពារកណ្ដាលមកពង្រឹងតំបន់ការពារដែលខ្វះខាត។ កន្លងមក Leicester ក៏ធ្លាបចាប់អារម្មណ៍ចង់បានខ្សែបម្រើការពារព័រទុយហ្គាល់វ័យ២៨ឆ្នាំផងដែរ ដើម្បីជួយពង្រឹងក្រុមឱ្យបានល្អប្រសើរ មុនពួកគេចូលរួមការប្រកួតពានអឺរ៉ុប។ ដើម្បីអាចនាំយក Carvalho មកចូលក្រុមបាន Leicester ត្រូវចំណាយប្រមាណ ២៥លានអឺរ៉ូ។
ខ្សែការពារ Perr Schuurs ដែលជាកីឡាករគោលដៅរបស់ក្លិបហង្សក្រហម Liverpool បានបញ្ជាក់យ៉ាងច្បាស់ថា រូបគេមិនទាន់ត្រៀមខ្លួន ក្នុងការចាកចេញពី Ajax នៅឡើយទេ។ នេះបើតាមការចុះផ្សាយរបស់សារព័ត៌មាន The Mirror។ ខ្សែការពារកណ្ដាលជនជាតិហុល្លង់រូបនេះ ក៏បានបង្ហាញវត្តមានផងដែរ ក្នុងការប្រកួតកាលពីថ្ងៃអង្គារដែល Ajax បរាជ័យ ១-០ ក្រោមថ្វីជើងរបស់ Liverpool នៅវគ្គចែកពូល Champions League។ Liverpool កំពុងប្រឈមការខ្វះខាតកីឡាករតំណែងខ្សែការពារកណ្ដាល ប៉ុន្ដែក្លិបពុំបានបញ្ជាក់ថា ពួកគេចាប់អារម្មណ៍ចង់ទិញខ្សែការពារហុល្លង់ ដែលមានតម្លៃ២៧លានផោននៅឡើយទេ។ ហើយ Schuurs ក៏បានបញ្ជាក់ផងដែរ ថារូបគេក៏មិនចង់ចាកចេញពី Ajax ដែរ ព្រោះចង់ពង្រឹងសមត្ថភាព និង បទពិសោធនៅទីនោះឱ្យបានល្អប្រសើរជាមុនសិន។
តាមការចុះផ្សាយរបស់សារព័ត៌មានអេស្ប៉ាញ MARCA បានឱ្យដឹងថា ប្រធានក្លិប Real Madrid លោក Florentino Perez សម្លឹងឃើញ អតីតអ្នកចាត់ការក្លិប Tottenham Hotspur លោក Mauricio Pochettino និង គ្រូបង្វឹកឈុត Castilla លោក Raul Gonzalez ជាបក្ខភាពជំនួសតំណែងលោក Zinedine Zidane ដែលប្រឈមនឹងការបណ្ដេញចេញពីតំណែង។ ប្រភពខាងលើបានអះអាងថា លោក Pochettino ជាបក្ខភាពដ៏សក្ដិសមបំផុតសម្រាប់ Real Madrid ស្របពេលដែលលោកនៅទំនេរពុំទាន់មានក្រុមដឹកនាំនៅឡើយ ហើយលោកធ្លាប់ត្រូវបាន ក្លិបអេស្ប៉ាញមួយនេះ ទាក់ទងមកដឹកនាំក្រុមជំនួសលោក Rafa Benitez កាលលោកនៅដឹកនាំ Spurs ប៉ុន្ដែត្រូវបានរារាំងដោយ នាយកគ្រប់គ្រងរបស់ក្លិបអង់គ្លេសលោក Daniel Levy។ រីឯលោក Raul ដែលយល់ច្បាស់ពី កីឡាករ និង រចនាសម្ព័នរបស់ក្លិប អាចនឹងមានឱកាសដឹកនាំក្រុមនាពេលអនាគត ប៉ុន្ដែ បទពិសោធដឹកនាំក្រុមរបស់លោក នៅក្មេងខ្ចីនៅឡើយ។
ប៉ុន្ដែបើតាមសារព័ត៌មាន talkSPORT វិញ បានឱ្យដឹងថាលោក Pochettino អាចនឹងជំនួសតំណែងអ្នកចាត់ការក្លិប Paris Saint-Germain របស់លោក Thomas Tuchel ប្រសិនបើក្លិបបារាំងមិនអាចឆ្លងផុតវគ្គចែកពូល Champions League បាន។កុងត្រាបច្ចុប្បន្នរបស់លោក Tuchel នឹងផុតកុងត្រានៅរដូវក្ដៅឆ្នាំ២០២១ ហើយមានការរាយការណ៍ថា លោកនឹងមិនទទួលបានការព្រមព្រៀងបន្ដកុងត្រាពីប្រធានក្លិប PSG នោះទេ ដោយក្លិបកំពុងស្វែងរកអ្នកថ្មីមកជំនួសតំណែងរបស់ អតីតគ្រូបង្វឹកក្រុម Borussia Dortmund រូបនេះ។
ក្លិបញញួរធំ West Ham កំពុងត្រៀមបន្ដកិច្ចសន្យាជាមួយអ្នកចាត់ការក្លិប David Moyes ដែលដឹកនាំក្រុមឡើងមកលេខ៥ ក្នុងតារាង Premier League នៅរដូវកាលនេះ បន្ទាប់ពីយកឈ្នះ Aston Villa ២-១។ដោយពេញចិត្តរបៀបដឹកនាំក្រុមបានល្អរបស់លោក Moyes ក្លិប West Ham បានត្រៀមការចរចាបន្លាយកុងត្រាជាមួយអ្នកចាត់ការជនជាតិស្កុតឡែន ដែលនឹងផុតកំណត់នៅចុងរដូវកាលនេះ៕