ដ្បិតមានវ័យ៣៥ឆ្នាំក៏ពិតមែន ប៉ុន្ដែ Cristiano Ronaldo នៅតែបង្ហាញថា គេជាកីឡាករល្អបំផុតមួយរូបនាពេលបច្ចុប្បន្ននេះ ហើយអ្វីទាំងអស់ត្រូវបានស្ដែងឱ្យឃើញនៅលើទីលានប្រកួត។
Ronaldo បានដើរតួយ៉ាងសំខាន់នៅក្នុងក្រុមជម្រើសជាតិព័រទុយហ្គាល់ និង ក្លិបសេះបង្កង់ Juventus ដោយតែងរកគ្រាប់បាល់បញ្ចូលទីសឹងគ្រប់ប្រកួតឱ្យពួកគេ។ ពេលនេះ AMS Sports សូមបង្ហាញសមិទ្ធផលធំៗ ដែលម្ចាស់ពាន Ballon dÓr ៥សម័យរូបនេះ សម្រេចបាននៅក្នុងឆ្នាំ ២០២០។
១. ការពារជើងឯក Serie A
Ronaldo ជាចំនែកធំមួយក្នុងការជួយ Juventus ការពារតំណែងជើងឯកនៅរដូវកាល ២០១៩-២០។ ខ្សែប្រយុទ្ធព័រទុយហ្គាល់ រកគ្រាប់បាល់បាន៣១គ្រាប់នៅ Serie A ក្នុងរដូវកាលមុន ដែលធ្វើឱ្យក្លិបសេះបង្កង់កាន់កាប់តំណែងជើងឯកលីគកំពូលអ៊ីតាលី៩ឆ្នាំជាប់គ្នា។
២. កីឡាករដំបូង ដែលរកគ្រាប់បាល់បាន៥០គ្រាប់នៅ Premier League, La Liga និង Serie A
ខ្សែប្រយុទ្ធវ័យ៣៥ឆ្នាំ រកគ្រាប់បាល់ទី៥០នៅ Serie A ឱ្យក្លិប Juventus កាលពីខែកក្កដា ឆ្នាំ២០២០ ហើយគេក្លាយជាកីឡាករដំបូងដែលអាច រកបាន៥០គ្រាប់នៅលីគកំពូលអង់គ្លេស កាលនៅ Manchester United នៅលីគកំពូលអេស្ប៉ាញជាមួយ Real Madrid និង លីគកំពូលអ៊ីតាលីជាមួយក្លិបបច្ចុប្បន្ន Juventus។
៣. កីឡាករដែលរកគ្រាប់បានច្រើនបំផុតក្នុងមួយរដូវកាលសម្រាប់ Juventus
Ronaldo រកគ្រាប់បាល់សរុប៣៧គ្រាប់ គ្រប់ការប្រកួតឱ្យ Juventus កាលពីរដូវកាលមុន ដែលជាចំនួនគ្រាប់បាល់ខ្ពស់បំផុតមិនមានកីឡាករណាមួយរបស់ពួកគេធ្លាប់ធ្វើបាន នៅក្នុងប្រវត្តិសាស្ដ្ររបស់ក្លិប Juventus។
នៅរដូវកាលនេះ Ronaldo រកគ្រាប់បាល់បាន ១៦គ្រាប់ហើយ ពីការចូលលេង១៦លើក សម្រាប់ក្លិបដែលមានមូលដ្ឋាននៅទីក្រុងទូរីន។
៤. កីឡាករនៅទ្វីបអឺរ៉ុបទី១ ដែលរកបាន១០០គ្រាប់ឱ្យក្រុមជម្រើសជាតិ
ប្រធានក្រុមព័រទុយហ្កាល់ រកគ្រាប់បាល់បានច្រើនជាង១០០គ្រាប់ហើយ(បច្ចុប្បន្ន១០២គ្រាប់) ក្នុងការចូលលេងឱ្យក្រុមជម្រើសជាតិរបស់ខ្លួន ១៧០លើក ហើយគេជាកីឡាករទី១នៅអឺរ៉ុប ដែលឈានដល់គោលដៅមួយនេះ។
Ronaldo រកបានគ្រាប់បាល់ទី១០០របស់ខ្លួន ដោយការស៊ុតហ្វ្រីឃីគបានយ៉ាងល្អ នៅក្នុងការប្រកួតដែលក្រុមព័រទុយហ្គាល់ យកឈ្នះស៊ុយអែតដោយលទ្ធផល ២-០ នៅ UEFA Nations League។
ហើយកីឡាករពាក់អាវលេខ៧រូបនេះ ត្រូវការតែ៧គ្រាប់ទៀតប៉ុណ្ណោះ ដើម្បីតាមស្មើកំណត់ត្រាគ្រាប់បាល់ច្រើនបំផុត របស់វីរបុរសអ៊ីរ៉ង់ Ali Daei ដែលរកបាន ១០៩គ្រាប់ មុនព្យួរស្បែកជើងពីបាល់ទាត់។
លើសពីនេះទៅទៀត Ronaldo ទទួលបានពានរង្វាន់កីឡាករប្រចាំសតវត្សរ៍ទី២១ របស់ Globe Soccer Awards នៅទីក្រុងឌូបៃ កាលពីថ្ងៃអាទិត្យ ទី២៧ ខែធ្នូ ឆ្នាំ២០២០ ដែលជាពានត្រូវបានផ្ដល់ឱ្យកីឡាករល្អបំផុតគិតចន្លោះពីឆ្នាំ ២០០១ ដល់ឆ្នាំ ២០២០៕
