ក្រុម Sporting Lisbon ក្លាយជាម្ចាស់ពានរង្វាន់ Primeira Liga រដូវកាល២០២០-២១ បន្ទាប់ពីផ្ដួល១-០លើ Boavista យប់ថ្ងៃអង្គារទី១១ខែឧសភា។ នេះជាការឈ្នះលីគកំពូលព័រទុយហ្គាល់លើកទី១របស់ពួកគេតាំងពីឆ្នាំ២០០២មក និងជាលើកទី១៩ក្នុងប្រវត្តិសាស្ត្រ។
កីឡាករ Paulinho ជាអ្នករកបានគ្រាប់បាល់តែ១គត់ក្នុងការប្រកួតនៅនាទី៣៦សម្រាប់ម្ចាស់ផ្ទះ។
Sporting Lisbon ដែលបង្វឹកដោយលោក Ruben Amorim មិនទាន់ចាញ់ឡើយក្នុងរដូវកាលនេះ និងនាំមុខ៨ពិន្ទុលើក្រុមលេខ២ Porto ខណៈសល់តែ២ប្រកួតទៀតប៉ុណ្ណោះ។
Sporting Lisbon បានឡើងកាន់កាប់កំពូលតារាង Primeira Liga តាំងពីដើមខែវិច្ឆិកាមក និងបន្តនៅទីនេះជាប់រហូតមកទល់ពេលនេះតែម្ដង។
ការលើកពានរបស់ Sporting Lisbon ជាការបញ្ចប់ភាពត្រួតត្រារបស់ Porto និង Benfica ក្នុងលីគកំពូលព័រទុយហ្គាល់រយៈពេល១៩ឆ្នាំមកនេះ។
Sporting ក៏បានឈ្នះពាន League Cup ផងដែរកាលពីខែមករា៕
