បាល់ទាត់ជាកីឡាម្យ៉ាងដែលលេងជាក្រុម ហើយក្រុមនោះទៀតសោត កំណត់ឱ្យមានសមាជិក១១រូប សម្រាប់ក្រុមម្ខាងៗដើម្បីចាប់ផ្ដើមការប្រកួត ដោយក្នុងនោះមានអ្នកចាំទីម្នាក់ និងអ្នកលេងនៅពីមុខ១០នាក់ផ្សេងទៀត ប្រជែងគ្នានៅលើទីលាន។
ប៉ុន្ដែអ្នកមានដឹងទេថា មុននឹងបានទម្រង់ដូចយើងឃើញបច្ចុប្បន្ន បាល់ទាត់ទម្រង់ដើមមានកីឡាករចូលរួមក្នុងមួយប្រកួតៗដល់ទៅជាង៥០នាក់ឯណោះ។ នេះបើយោងតាមវិបសាយ Enfocamp និង Football-stadiums។
តាមប្រភពទាំង២ខាងលើ ចំនួនកីឡាករផ្លូវការសម្រាប់ចាប់ផ្ដើមការប្រកួតបាល់ទាត់ ត្រូវបានផ្លាស់ប្ដូរជាច្រើនលើក ទម្រាំនៅសល់តែ១១នាក់ដូចបច្ចុប្បន្ន។
ដំបូងឡើយ នៅក្នុងការប្រកួត Calcio Fiorentino (ជាកីឡាដើម មុនបំលែងចេញជាបាល់ទាត់) ក្រុមម្ខាងមានកីឡាករចំនួន២៧នាក់នៅលើទីលាន ហើយ៥នាក់ជាអ្នកចាំទី។ កីឡាករទាំងនោះប្រកួតគ្នានៅលើទីលាន ដែលមានទំហំប្រហាក់ប្រហែលនឹងទីលានបច្ចុប្បន្ន ធ្វើឱ្យការប្រកួតមានភាពរញ៉េរញ៉ៃខ្លាំងណាស់។
នៅពេលកីឡាដែលគេឱ្យឈ្មោះថា Medieval Football មកដល់ទឹកដីអង់គ្លេស បទបញ្ជានៅក្នុងការប្រកួតត្រូវបានផ្លាស់ប្ដូរ ប៉ុន្ដែមិនច្រើនទេ។ ក្រុមនីមួយៗដាក់កីឡាករ ១៥ ទៅ ២១នាក់ នៅក្នុងជម្រើសដំបូង ដើម្បីអនុញ្ញាតឱ្យកីឡាករមួយចំនួន បានអង្គុយនៅកៅអីបម្រុងសម្រាប់ត្រៀមផ្លាស់ប្ដូរ។ ទីបំផុតនៅឆ្នាំ ១៨៧០ ក៏មានការសម្រេចព្រមព្រៀងធ្វើការផ្លាស់ប្ដូរ ដោយតម្រូវឱ្យក្នុងការប្រកួតមួយក្រុមម្ខាងមានអ្នកចាំទីម្នាក់ និងកីឡាកររត់លើទីលាន១០នាក់។
មូលហេតុដែលធ្វើឲ្យមានការផ្លាស់ប្ដូរនេះមិនត្រូវបានបង្ហាញឲ្យច្បាស់លាស់នោះទេ ប៉ុន្ដែគេជឿថា ឆ្លងកាត់ការធ្វើតេស្ដតាមបទពិសោធ និងផ្នែកវិទ្យាសាស្ដ្រជាច្រើនដំណាក់កាល បានបង្ហាញថា មានកីឡាករត្រឹម២០នាក់រត់នៅលើទីលាននិងមានអ្នកចាំទី២នាក់(ម្ខាង១) គឺគ្រប់គ្រាន់ល្មម។
ហេតុផលមួយផ្សេងទៀតចំពោះការកំណត់ឱ្យមួយក្រុមដាក់កីឡាករ១១នាក់ចាប់ផ្ដើមការប្រកួត គឺដើម្បីសម្របទៅនឹងកីឡាដែលមានប្រជាប្រិយភាពផ្សេងទៀតដូចជា គ្រីឃីត(Cricket) ហុកគី និង បាល់ទាត់អាមេរិក (American Football) ជាដើម។
ដោយឡែក សូមជម្រាបផងដែរថាតាមច្បាប់បាល់ទាត់បច្ចុប្បន្ន អំឡុងការប្រកួត ក្រុមម្ខាងត្រូវនៅសល់គ្នាយ៉ាងហោច៧នាក់ទើបអាចបន្តការប្រកួតដល់ចប់ចុងចប់ដើមបាន៕
