Atletico Madrid បន្តក្ដោបក្ដាប់កំពូលតារាង La Liga ដែលនៅសល់១សប្ដាហ៍ប្រកួតទៀតប៉ុណ្ណោះ បន្ទាប់ពី Luis Suarez រកបានគ្រាប់ជ័យជម្នះយ៉ាងរំភើបនៅក្នុងនាទី៨៨ ដើម្បីផ្ដួល Osasuna ២-១ និងរក្សាគម្លាតនាំមុខ២ពិន្ទុលើគូប្រជែងរួមក្រុង Real Madrid ដែលនៅតែបន្តប្រដេញដល់ទីបញ្ចប់ ក្រោយឈ្នះ១-០ក្នុងថ្ងៃជាមួយគ្នានៅផ្ទះ Athletic Bilbao តាមរយៈគ្រាប់របស់ Nacho ក្នុងនាទី៦៨។
យប់មិញនេះ ម្ចាស់ផ្ទះ Atletico ត្រូវបានភ្ញៀវ Osasuna ដែលជាក្រុមពាក់កណ្ដាលតារាង នាំមុខមុនក្នុងនាទី៧៥។
ប៉ុន្តែ៧នាទីបន្ទាប់ Renan Lodi ដែលបានប្ដូរចូល ស៊ុតបញ្ចូលទីតាមស្មើឱ្យក្រុមលោក Diego Simeone។ ៦នាទីបន្ទាប់មកទៀត ពោលគឺនៅនាទី៨៨ Yannick Carrasco បញ្ជូលបាល់កាត់មកក្រោយឱ្យខ្សែប្រយុទ្ធអ៊ុយរុយហ្គាយ Suarez ទាត់បញ្ចូលយក៣ពិន្ទុយ៉ាងរំភើប។
![](https://asset.ams.com.kh/sports/media/atm-1024x791.jpg)
Atletico ពេលនេះខិតកាន់តែកៀកមែនទែនហើយនឹងការឈ្នះពាន La Liga លើកដំបូងតាំងពីឆ្នាំ២០១៤ ដ្បិតពួកគេមាន៨៣ពិន្ទុពី៣៧ប្រកួត ច្រើនជាង២ពិន្ទុលើគូប្រជែងតែមួយគត់ដែលនៅសល់ គឺ Real Madrid។ ចំណែក Real មាន៨១ពិន្ទុ។
នៅថ្ងៃប្រកួតបញ្ចប់រដូវកាល គឺថ្ងៃទី២៥ខែឧសភា Atletico ត្រូវលេងនៅទឹកដីក្រុមលេខ១៩ Real Valladolid ដែលក៏ត្រូវការឈ្នះដែរដើម្បីអ៊ុតក្ដីសង្ឃឹមនៅលីគកំពូលបន្តទៀត។ ខណៈ Real ត្រូវទទួល Villarreal៕
![](https://asset.ams.com.kh/sports/media/laliga-1024x761.png)