លោក ឈឿន ម៉ាលែន គណៈកម្មការរៀបចំការប្រកួត ជើងឯកក្លឹបវាយសីភ្នំពេញបានប្រាប់មកកាន់ក្រុមការងារ AMS Sports អំពីគោលបំណងចម្បងៗដែលក្លឹបរៀបចំការប្រកួតកម្រិតក្លឹបនេះឡើងក្នុងន័យវាស់ស្ទង់សមត្ថភាពរបស់ក្រុមកីឡាករ-កីឡាការិនីរបស់ក្លឹបដែលបានហ្វឹកហាត់កន្លងមកនេះ និងក៏ដើម្បីជាការសម្លឹងមើលនៅធនធានកីឡាករដែលមានសក្តានុពលយកមកដុសខាត់បន្ថែមត្រៀមចូលរួមព្រឹត្តិការណ៍ផ្សេងៗក្នុងពេលអនាគត់។
គណៈកម្មការវ័យក្មេងរូបនេះបានបន្តទៀតថាសម្រាប់ការប្រកួតនេះគឺជាពេលល្អមួយសម្រាប់ក្រុមកីឡាករវ័យក្មេងៗចំណុះក្លឹបដែលបង្ហាញសមត្ថភាពលេចធ្លោនោះ ពួកគេនឹងទទួលបានឱកាសពីក្លឹបក្នុងការក្លាយខ្លួនជាកីឡាករតំណាងក្លឹប ពិសេសទទួលបានការបង្វឹកបង្ហាត់បន្ថែមពីគ្រូជំនាញៗប្រចាំក្លឹបវាយសីភ្នំពេញផ្ទាល់។
គួរបញ្ជាក់ផងដែរ ការប្រកួតពានរង្វាន់ជើងឯកក្លឹបវាយសីភ្នំពេញនឹងប្រព្រឹត្តទៅនៅថ្ងៃសៅរ៍ និងអាទិត្យទី ១៤-១៥ ខែធ្នូ ឆ្នាំ២០២៤ ចាប់ពីម៉ោង ៨ព្រឹកដល់ម៉ោង ៥ល្ងាច នៅទីស្នាក់ការ ស.ស.យ.ក រាជធានីភ្នំពេញ៕
