ថ្ងៃទី០១ ខែមេសា ឆ្នាំ២០២៥ អ្នកជំនាញកីឡាខ្មែរ២រូប គឺលោក ទេស សូ និង អ្នកស្រី សូ រ៉ាន់ដេត បានទទួលមរណភាពដោយរោគាពាធ។
បើតាមការឱ្យដឹង លោកគ្រូ ទេស សូ ធ្លាប់ជាអនុប្រធានមន្ទីរអប់រំ យុវជន និង កីឡាខេត្តព្រៃវែង ក៏ដូចជាសមាជិកគណៈ កម្មាធិការប្រតិបត្តិនៃសហព័ន្ធកីឡាប៊ូលនិងប៉េតង់កម្ពុជា និង សហព័ន្ធកីឡាប្រដាល់គុនខ្មែរ រួមនិងសហព័ន្ធកីឡាមួយចំនួនទៀត។
លោកបានទទួលមរណភាពនៅព្រឹកថ្ងៃទី០១ ខែមសា។ នៅរាត្រីថ្ងៃដដែល ដំណឹងសោកសៅមួយទៀត ការចែកឋានរបស់អ្នកស្រី សូ រ៉ាន់ដេត គ្រូបង្វឹកជម្រើសជាតិកីឡាទ្រីយ៉ាត្លុងកម្ពុជា។
បើតាមការចុះផ្សាយពីសារព័ត៌មានក្នុងស្រុក អ្នកគ្រូ សូ រ៉ាន់ដេត ធ្លាប់ជាកីឡាការិនីហែលទឹកកម្ពុជា អំឡុងទសវត្សរ៍ឆ្នាំ១៩៨០ ហើយក្រោយមកបានចូលធ្វើជាគ្រូអប់រំកាយ និងកីឡា។ រហូតដល់ឆ្នាំ២០១១ អ្នកស្រី សូ រ៉ាន់ដេត បានក្លាយជាគ្រូជម្រើសជាតិកីឡាទ្រីយ៉ាត្លុងកម្ពុជា និងសមាជិកប្រតិបត្តិសហព័ន្ធកីឡាទ្រីយ៉ាត្លុងកម្ពុជា។
ប្រភពជិតស្និទ្ធបានឱ្យដឹងថា អ្នកគ្រូ សូរ៉ាន់ដេត បានតស៊ូនឹងជំងឺមហារីកជាងមួយឆ្នាំមកហើយ។ អ្នកគ្រូទើបបាត់បង់ម្ដាយបង្កើត កាលខែធ្នូ ឆ្នាំទៅមិញដែរ៕
